भ्रमण वर्ष २०२० ताःलाकेगु नितिं ज्याझ्वः दय्केमाल
जुजुमान महर्जन
सरकारं सन् २०२०यात नेपाल भ्रमण वर्षकथं हनेगु घोषणा याःगु दुसा थ्व हे आपालं विदेशी पर्यटकपिं दुकाय्गु नितिं आपालं ज्याझ्वः याय्गु घोषणा याःगु दु । थ्व हे सन्दर्भय् नेपाःया थीथी थाय्यात गन्तब्य स्थलकथं घोषणा यानाः अनया विकासया नितिं ज्याझ्वः दय्केगु ज्या जूगु दुसा मेखे अनया स्थानीय जनतात नं उलि हे उत्साहित जुयाच्वंगु दु ।
तर नेपाल भ्रमण वर्ष हनेगु नितिं गुलि ज्या रफ्तारं न्ह्याकेमाःगु खः उलि धाःसा जुयाच्वंगु खनेमदुसां मचाय्कं विदेशी राष्ट्रप्रमुखपिनिगु भ्रमणं यानाः विदेशी पर्यटकपिनिगु ल्याः धाःसा छुं भचा अप्वःगु दु । थुकिया दसूकथं चिनियाँ राष्ट्रपति नेपाः वय्धुंकाः नेपालय् चिनियाँ पर्यटकपिनगु ल्या अप्वःगु तथ्यांक खः । थ्व हे झ्वलय् विदेशी राष्ट्रपतिया आगमनं अझ थुकी तिबः बीगु आशा याय्फइ ।
नेपालय् पर्यटकपिनिगु ल्याः अप्वय्केगु निति थीथी ज्याझ्वःया नापनापं थन दुहां वइपिं पर्यटकपिनिगु नितिं माःकथं सुविधा बीगु ज्याझ्वः नं न्ह्याकेमाःगु खनेदु । विशेष यानाः नेपाःया सच्छिगू थाय्यात गन्तब्यकथं घोषणा याय्धुंकाः अन पर्यटकपिन्त आकर्षित याय्ग नितिं अनया थाय्या विशेषतायात कयाः प्रचारप्रसार याय्माःगु खनेदु । थुकिया दायित्व धइगु स्थानीय जनतातय्गु जक मखु, सरकारयागु नं खः । अर्थात अनया स्थानीय सरकारलिसे समन्वय यानाः प्रचारप्रसार याय्माःगु आःया आवश्यकता खः ।
खय्त ला नेपाल भ्रमण वर्ष २०२० घोषणा याय्धुंकाः मचाय्कं थीथी थासय् थुकिया प्रचार प्रसार जूगु खनेदुसा विदेशय् नं थुकियात कयाः संस्कृति पर्यटन तथा नागरिक उड्डयन मन्त्री योगेश कुमार भट्टराईं नं यूरोप भ्रमणया झ्वलय् प्रचारप्रसार याःगु खनेदु । अथे हे, नेपाल भ्रमण वर्षया नितिं हिमाल आरोहण याइपिं विदेशी पर्यटकपिनिगु नितिं न्हूगु हिमाल चाय्केगु नं उद्घोष याःगु दु । निश्चितरुपं थुकिं नं विदेशी पर्यटकपिं नेपाः भ्रमण याय्गु नितिं बांलाःगु ह्वःताः जुइफु ।
नेपाल भ्रमण वर्ष घोषणाया नापनापं नेपाल सरकार व स्थानीय सरकारपाखें भुखाचं लिच्वः लाकूगु सम्पदाया नं द्रुतगतिं पुनःनिर्माण याय्माःगु खनेदु । विशेष यानाः स्वनिगलय् लिच्वः लानाच्वंगु थीथी सम्पदाया पुनःनिर्माण याय्गु ज्या अझं क्वचाःगु मदुनिसां थुकिया पुनःनिर्माणया ज्या धाःसा न्ह्यानाच्वंगु खनेदु । यँे, यल व ख्वपया लाय्कुली दुगु सम्पदाया पुनःनिर्माणया ढीलासुस्तिं यानाः नं मचाय्कं पर्यटक आवागमनय् लिच्वः लानाच्वंगु दुसा पुनःनिर्माणया नापनापं थुकिया ल्याः नं अप्वयाच्वंगु दसू धइगु थौंकन्हय् येँया हनुमानध्वाखा क्षेत्रय् स्वःवइपिं पर्यटकपिनिगु ल्याः अप्वःगु खः । वंगु असोज महिनाय् स्वयां कार्तिक महिनाय् थ्यंमथ्यं निदुगलं अप्वःगु ल्याखं नेपाःया भ्रमण वर्ष २०२०यात ताःलाकेगु नितिं ग्वाहालि जूवनीगु संकेत खः ।
अथे खःसां थुगु लागाय् अझ नं सम्पदाया पुनःनिर्माणया ज्या धाःसा क्वचाःगु मदुनि । उकिं नेपाःया भ्रमण वर्ष ताःलाकेगु खःसा निश्चित रुपं विदेशी पर्यटकपिनिगु रुचि, नेपाःया विशेषता लिसें पर्यटकपिं च्वनेगु, नय्गु व्यवस्थालिसें यात्रायात सुलभ जुइकथंया ज्या जुइमाः । थथे मजुल धाःसा नेपालय् यक्व पर्यटकपिं दुहां वःसां स्तरीय पयर्टकत दुहां मवल धाःसा सरकारं लक्षित यानातःगु ल्याः ला पूवनी जुइ, तर पर्यटन विकासय् धाःसा खास हे ह्यूपाः मवय्फु । थुकियात कयाः नं सम्बन्धित पक्षं बिचाः याय्माःगु खनेदु ।
