भ्रष्टाचार काण्डयात प्रभावित याय्गु ज्या
जुजुामान महर्जन
भ्रष्टाचारयात कयाः शून्य सहनशीलता नारा ज्वनाः सरकारय् दुहांवंपिं नेतात आखिर अन्तय् थुगु नाराय् गुलितक सम्बेदनशील जू धइगु खँ प्रमाणित याना बीधुंकूगु दु, वर्तमान सरकारया पूर्व प्रवक्तालिसें सञ्चार मन्त्री गोकुल बास्कोटया सेक्यूरिटी प्रेस खरिद काण्डपाखें । बास्कोटाया थुगु काण्ड पिने वय्वं वय्कःया विरुद्ध भ्रष्टाचार सम्बन्धि आपालं खँत पिहां वयाच्वंगु दु । अथेखःसां थुकियात कयाः पुष्टि याय्गु ज्या अर्थात अनुसन्धान याय्गु ज्या न्ह्यानाच्वंगु दु ।
भ्रष्टाचारयात कयाः न्ह्याबलें न्यूनीकरण याय्माः धकाः आपालं थासय् न्ववानादीम्ह बास्कोटा पत्रकारतलिसे उलि हे कठोर जुयाच्वनादीम्ह खः । पत्रकारतय्त मिखा बागलं स्वय् मयः धइगु् खँ वय्कःलिसे प्रेस सेक्यूरिटी खरिद काण्डय् पत्रकारतय्त अश्लील खँग्वः न्ववानादीगुलिं स्पष्ट जूगु दु । तर सायद वय्कःया भ्रष्टाचार सम्बन्धि आपालं खँ पिहांवइ धकाः हे वय्कः न्ह्याबलें पत्रकारतलिसे रुष्ट जुयाच्वनीगु खः ।
अथे ला प्रतिपक्षी पार्टीयात कयाः नं उलि हे कठोर जुयादीम्ह पूर्व मन्त्री बास्कोटया थःगु कर्तुत पिहां वय्वं थौंकन्हय् गजाःगु अवस्थाय् दु धकाः सकस्यां स्यू । अथेखःसां नं थःगु अहम्कार अझ नं म्हो मजुनि । खय्त ला थुकिया लिच्वः गजाःगु पिहांवइगु खः, व अनुसन्धानपाखें सीदइ तिनि ।
भ्रष्टाचारयात कयाः शून्य सहनशीलता नारा ज्वनाः कडा कारवाही याय्त छुं नं कसर त्वःते मखु धकाः न्ववानादीम्ह प्रधानमन्त्री केपी शर्मा ओली थः हे पूर्व सञ्चारमन्त्रीयात बचय् याय्गु ज्याय् न्ह्यज्यानाच्वंगु दु । थःगु सरकारया छम्ह दुजलं याःगु कर्तुतयात त्वपुइगु नितिं थीथी खँत न्ववाना जूगु खँ अशोभनीय जक मखु, छम्ह जिम्मेवार पदय् च्वनाच्वंम्हेस्यां थजाःगु खँत न्ववाना जुइगु गुलितक ल्वःगु खँ खः ? थुकियात कयाः बिचाः याय्माःगु खनेदु ।
थौंकन्हय् भ्रष्टाचार याःपिं कर्मचारीपिन्त ज्वनेगु अले अख्तियारपाखें मुद्दा न्ह्याकाच्वंगु खबरत यक्व हे पिहां वयाच्वंगु दु । थजाःगु ज्याय् गुलिं निर्दोष साबित जुयाच्वंगु दुसा गुलिं दोषीया भागीदार जुयाः सजाँय नं फयाच्वंगु दु । तर थौंकन्हय् भ्रष्टाचार याःपिन्त ज्वनेगु ज्या गुगु जुयाच्वंगु दु, छगूकथं स्वय्गु खःसा भ्रष्टाचारयात कयाः सरकार न्ह्यज्यानाच्वंगु दु धइगु आभाष ब्वलंकाब्यूगु दु ।
तर सरकारया छम्ह दुजलं याःगु भ्रष्टाचार गुलि सम्बेदनशील जुइ धइगु खँय् सकस्यां बिचाः याय्माःगु खः । अझ धाय्गु खःसा सरकार थुकियात कयाः सफाइ बीकथं न्ववाय्गु स्वयां नं थुगु काण्डयात निष्पक्षढंगं क्वचाय्केगु नितिं ग्वाहालि याय्माःगु खः ।
थुकियात कयाः जुयाच्वंगु अनुसन्धानयात कयाः सरकारं जनताया विश्वास त्याइकथं ग्वाहालि बीमाःगु अवस्थाय् अःखतं अनुसन्धानयात हे लिच्वः लाकीगु कथं गुगु ज्या स्वयम् प्रधानमन्त्रीं हे अभिब्यक्ति बीगु, अले दोषीया पक्षय् न्ववाय्गु ज्या जुयाच्वंगु दु, थुकिं भ्रष्टाचारयात अझ तिबः बीगु ज्याजक मखु, स्वयम् सरकार थःम्हेस्यां हे बदनाम यानाच्वंगु दु । भ्रष्टाचारय् शून्य सहनशीलताया नारा बियाः सरकारया थजाःगु ज्यायात कयाः गुकथं भ्रष्टाचार निवारण जुइ धइगु खँय् शंकाया दृष्टिं स्वय्त बाध्य यानाब्यूगु दु ।
