भ्रष्ट अनैतिक नेतात झन् खतरा
डि.आर. खड्गी
 
न्ह्याग्गु क्षेत्रय् नं निगू पक्षया दथुइ संघर्ष जुयातुं च्वनी । निगू पक्षया अर्थ खः, सत्य पक्ष व असत्य पक्ष । विशेष यानाः राजनैतिक क्षेत्रय् अझ अप्वः सत्य व असत्य पक्षया दथुइ झन् अप्वः संघर्ष जुयाच्वनी । इतिहासं नं क्यनाच्वंगु दु कि असत्य पक्षं यक्व आधिपत्य कायम यानातुं च्वनीगु खँ न्ह्यथनातःगु दु ।
 
देशया राजनीति नं अर्थात सामन्ति वा तानाशाही विरुद्ध सत्य पक्ष क्रान्ति यानाः सत्राय् वइसा असत्य पक्ष धाःसा क्रान्ति यानाः मखु, षडयन्त्र यानाः सत्ताय् वइ । सत्य पक्षयात असत्य पक्षं षडयन्त्र यानाः क्वत्यला तइ । झीगु देसय् जक थथे जुयाच्वंगु मखु, विश्वया आपालं देसय् असत्य पक्षं षडयन्त्रपाखें सत्ताय् वनाच्वंगु दु । 
 
असत्य पक्ष धाय्बलय् लुच्चा, फटाहा, बेइमान, भ्रष्टाचारी व अनैतिक ज्या यानाः देसयात बर्बाद यानाच्वनीपिं खः । सत्य पक्षया अर्थ सादा जीवन उच्च विचार ज्वनीपिं खः । सत्य पक्षया महानता धयागु थ्व खः । सत्य अथवा विवेकी सकारात्मक विचाः दुपिं नेतातय्गु ल्हातय् सत्ता लात कि देय् व जनताया प्रगति व उत्रतियात ध्यानय् तयाः ज्या यानाच्वनी । असत्य पक्ष सत्ताय् वन कि हाकुबञ्जा, माफिया व विदेशी शक्तिया दलाल जुयाः जनतायात दुःखकष्ट बीगु यानाच्वनीसा मेखे देसयात नं कंगाल यानाच्वनी ।
 
झीगु देसया राजनीति नं फटाहा, असत्यतय्गु पक्षया ल्हातय् नापनापं दलाल नेतात जुयाच्वंगु हुनिं जनतातय्त प्यखेरं मारय् लाकाः सास्ना बियाच्वंगु दु । राजनीतिक नेतात मभिंपि जुल कि मुक्कं देसयात हे नकारात्मक लिच्वः जक लाकाच्वनीगु मखु, देसयात नं बर्बाद याइ ।
 
थौंकन्हय् झीगु देसय् नं थथे जुयाच्वंगु दु । नेतातय्गु राजनीति हे जातिभेद, छुवाछुट वर्णभेदया दलदलय् तक्यनाच्वंगु दु । अझ थुलि जक मखु, जनतायात मूर्ख याय्गु नितिं धार्मिक नामं अन्धविश्वास ब्वलंकाः जनतायात फोहर कुसंस्कृति हनेत हःपाः बियाः जनताया आर्थिक अवस्था खराब याना वनेगु नं स्वयाच्वनी ।
 
अविकसित देस व विकसित देसया नेता व जनताया सोचया फरक थुकिं क्यनाच्वनी । विकसित देय्या नेता व जनतां देय्यात सही थासय् यंकेगुलिइ ध्यान बियाच्वनी । स्वयम् सरकारं हे उद्योग, बाणिज्य, व्यापारया नापनापं कृषिइ अप्वः ध्यान बियाच्वनी । सरकार हे न्ह्यज्यानाः जनतायात उत्पादनमूलक उद्योग, कृषि व मेमेगु लागाय् लगानी याकेत यक्व सुविधा बीगु यानाच्वनी ।
 
अविकसित देसया नेतात खराब जुयाच्वनीगुलिं व नेतातसें जनतायात च्यः, भ्वातिं यानाः जनतायात दरिद्र दय्का बी । जनतायात विदेसय् च्यः ज्या याकाः रोयल्टी नयाच्वनी । विकसित देसया नेता बांलाःपिं जुयाच्वनीगुलिं जनताया धेबा पाय्छि थासय् लगानी यानाः देय् व जनताया कल्याण याइ । यूरोप, चीन धनी जुयाच्वंगु कारण नेतात भिंपिं जुयाः खः । झीगु देस गरीब जक मखु, कंगाल जुया वनाच्वंगु हुनि नेतातय्गु सोच भ्रष्ट व दलाली जुयाः खः । दसूया नितिं चीनय् चाङ काइ सेकया शासनया इलय् अनया जनता अति गरीब जुयाच्वंगु खः । अझ थुलि जक मखु, जनतायात अनेककथं कष्ट नं बियाच्वनी ।
 
जनताया स्थिति तसकं खराब जुया वनाच्वंगु हुनि नं चाङ काइ सेक थः नं भ्रष्ट, शोषक वया नापनापं जापान व अमेरिकाया दलाल जुयाच्वंगुलिं खः । यूरोपय् नं सामन्ति जुजुतय्गु शासनया इलय् जनता नं अति गरीब जुजुं वनाच्वंगु खः । जब यूरोप व चीनय् सामन्ति शासकत पतन जुल, नेता नं भिंपिं सत्ताय् वल, देसया अवस्था अति हे बांलाना वन । चीनय् माओत्से तुङं देसयात ठीक यात, देसयात पाय्छि दिशाय् यंकल ।
 
अमेरिकाय् अब्राहम लिंकनं देसयात पाय्छि लँपुइ यंकेगु ज्या याःगु खः । तर छता खँ छु धाःसा देस गरीब जूसा थनया थनया नेता व उमिगु आसेपासेत व कर्मचारीत धाःसा अति हे धनि जुयाच्वंगु दु । पुलांगु राजनैतिक भासं धाय्गु खःसा जनता गरीब यानाः नेतात धनि जुइगु नीतियात सामन्ती शासक धाइ । सामन्ती शासर्क देस विकास याय्त माःगु धेबा थःगु छेँजःया नितिं विलासी खर्च यानाः फूर्ति यानाच्वनीपिं खः । 
 
इतिहासं प्रष्ट यानाच्वंगु दु फ्रान्सया जुजु लुइ सोह्रौंया लानी मेरी एन्टोनेटया सेवाया नितिं जक न्यासःम्ह नोकरचाकर लगय् जुयाच्वनी । जुजुया डाइनिङया मूल्य जक व इलय् १५गू लख । लानीं म्ह छम्हं लुँ, हिरा, मोतिं जाःगु वसः फिनाच्वनी । रुसया जारशाही परिवारया फुक्क दुजःपिन्सं विलासी जीवन हनाच्वनी । देसया फुक्क जग्गा जारशाहीया परिवारया दुजःतसें कब्जा यानाच्वनी । चीनया सामन्ती शासकत नं लुँयागु लाकां न्ह्याइगु धकाः इतिहासं प्रष्ट याः ।
 
खाली राजा महाराजा जक मखु, विश्वया तानशाह शासकतपाखें नं भ्रष्टाचार यानाः भोगविलास याना वंगु नं जनतां मस्यु मखु । नेपाःया राणा शासकतसें नं सच्छि व प्यदँतक अति हे शौखिन जीवन हनाः देसयात कंगाल याना थकल । बहुदल शासनया व्यवस्था वल नं पार्टीया नेतातसें नं यक्व भ्रष्टाचार व कमिशन नयाः पजेरो व ततःधंगु महलय् विराजमान जुयाच्वंगु दु । पुँजीवादी पार्टीया खँ ला त्वःते, जनपक्षीय कम्यूनिष्ट धाइपिं नेतातसें तकं अति हे भ्रष्टाचार व कमिशन नयाः जुजुतय्सं थें विलासी जीवन हनाच्वंगु खनाः जनता वाक्क दिक्क जुयाच्वंगु दु ।
झीगु देसय् संघीय शासनया सुरु जुइधुंकल ।
 
तर सम्पतिया रजाईं याइपिं जक अझ अप्वः जुयाच्वन । नेपाःया राजनीति केन्द्र व प्रदेशय् यानाः म्होतिं नं गुसःम्ह सांसदत दु । व फुक्कं सांसदतय्गु ज्या देसया सम्पतियात प्रत्यक्ष वा अप्रत्यक्षकथं लुटय् यानाः विलासी जीवन हनाच्वंगु खनेदु । थ्व हे हुनिं देस झन्झन् कंगाल जुलसा नेतात धाःसा झन्झन् धनी जुजुं वनाच्वन ।
 
विज्ञतसें धाय्गु याः, सामन्ती वा तानाशाही नेता स्वयां भ्रष्ट अनैतिक नेतातपाखें होसियार जुइमाः । छाय्धाःसा सामन्ती वा तानाशाहतसें खुल्लारुपं देस व जनतातय्त बर्बाद यानाच्वनी, तर भ्रष्ट व अनैतिक नेतातसें जनतायात दंगु नारा अथवा शब्दजाल लायाः जनतातय्त भ्रमय् तयाः देसया सम्पत्ति लुटय् यानाच्वनी । थ्व धापू झीगु देसय् पाय्छि जुयाच्वंगु दु । थनया नेतातसें नं
जनतायात आकर्षक नारा बियाः देय् व जनता बर्बाद यानाच्वंगु दु ।