भ्वय्
च्वमिः रेणु श्रेष्ठ, बालाजु
बुढेशकालय् इहिपाः याःम्ह व जिमि पासा, भ्वय् मवनेला धाःसां व तं चाइया पीर, वनेला धाःसां थः ग्याष्ट्रिक व चिनी ल्वय्या ग्वारा । थथे जूसांतबि पासाया बचं हारय् मयासें मानं सःतुथाय् अपमान छाय् याय् ? धकाः जिं थौं भ्वय् वनेगु हे क्वःछिना ।
द्वलंद्वः वाटया मतं झःझः धाःगु व भ्वय् छेँ । भ्वय् नः वयाम्ह जि नं छम्ह पाहां....। सुटवाल व टाइवाल नापनापं मिस्तला झन् छु कम.....? वसः व तिसां हे भ्वय् नइगुथें यानाः भ्वजय् सरिक जुयाच्वंपिं पाहांपिं ...!
ककटेल पार्टीया व भव्य लकसय् गुम्हं थःगु हे ताःलय् प्याखं हुलाच्वंपिंसा गुम्हं थःथःगु इच्छाकथं गिलास का गिलास ल्ह्वनाच्वंपिं......। मापसेयात छुं पर्वाह हे मयासें । गुम्हं द्वःछिनं मयाक्क वंगु डिनर प्लेट साला नय्यःगु नयाः मयःगु अथें वांछ्वया थकुपिं.......!
थुकथं भ्वय्छेँय् वःपिं मनूतयसं छम्ह छम्ह निम्ह निम्ह यायां मस्त बुराबुरी दक्वसियां अन तयातःगु नसाज्वलं प्लेटय् काकां नइपिं नं उलिहे अन......कयाः वांछ्वया थकूपिं नं उलिहे । तिलिक्क टल्के जूगु व थासय् गिलास प्लेट मूवःपिं नं उलिहे....!
७ वजेया पिक आवरया ई......! गिलास प्लेट मूजूपिन्सं व प्लेटय् वांछ्वया तःगु नसा पःखा ल्यूने पूmड कन्टेनर धकाः च्वयातःगु थासय् तय्यंकीगु जुया च्वन खनि ।
भ्वय्या सिजन उकिं जितः भ्वय् नय्गु रुचि मन्त, चिल्लो, चाकूगुपाखें थः तापाःसां बेस जुइथें ताय्काः स्नाय्क्स छकू निकू जक नयाः फुट्ट पिहां वय्त्यना.........। इहिपाः याःम्ह व जिमि पासां च्याप्प ज्वनाः त्वहे मत्वःतू जितः ला....! वयागु बचन हारय् मयासें पलख जि मेचय् तुं फ्यतुना ।
विदेशी म्यूजिकं झःझः धाःगु व भ्वय्छेँय् म्वःम्वः मनूत थःगु हे तालं प्याखं हुलाच्वंपिं.....! बागः प्वाः जाय्धुंकूम्ह जिं डिनर जक छाय् सितिकं छ्वय्गु धकाः डिनर मनय्गु क्वःछिना । जि नं वहे प्याखं हूथाय् स्वयाः मख्ख जुयाच्वना ।
पलख लिपा पासा वयाः जितः त्व हे मत्वःतल । डिनर नय्त बाध्य यात । खःथें मखुथें निगः निगः कयाः जिं डिनर क्वचाय्का । नापसं च्वंम्ह मनुखं डिनर प्लेटय् नसाज्वलं छख तयाः हयाः नय् मफयाः अथें प्लेट मेचया तःलय् बिस्तारं सुचके यंकल । व प्लेट चिप मूवम्हेसियां मुनायंकाः पूmड कन्टेनरय् तय्यंकल । थुकथं मुनाहःगु पूmड कन्टेनरय् ततं व पूmड कन्टेनरय् ला ‘पूmल’ हे जुइधुंकूगु जुयाच्वन ।
अनायसं जिगु मिखा भ्वय् पार्टी न्याय्काच्वंगु भ्वय्छेँया पिने गेटय् जूवन....! हुलि हुलि वःगु लं फिना मिखाय् लः जाय्का भ्वय्छेँया व पूmड कन्टेनरय् मिखा तयाः ई घुतुकाच्वंपिं व छथ्वः मस्त.....! ई घुतुकाच्वंपिं व छथ्वः मस्त......!! छथ्व मस्....ऽऽऽ.....ऽऽऽ...त....!!!
