एथ्लेटिको मड्रिडयात बुकाः लिभरपुल युएफा च्याम्पियन्स लिग फुटबल धेंधें बल्लाःया राउण्ड अफ सिक्सटिनय् थ्यंगु दु ।

वंगु चान्हय् थःगु हे ख्यलय् जूगु कासाय् लिभरपुल २–० गोलं त्याःगु खः । थ्व कासा त्याकूगु लिसें लिभरपुलं पुचःया प्यंगू कासां १२ ल्याः मुंकाः नक आउट झ्वलय् थःगु थाय् पक्का याःगु दु ।

थ्व पुचलय् ५ ल्याःलिसें निगूगु थासय् दुगु एफ.सी पोर्टों वंगु चान्हय् एसी मिलानलिसे १–१ गोलया ज्वलिंज्वः म्हितूगु दु । वंगु चान्हय् जूगु मेगु कासाय् जर्मनीया बोरुसीया डर्टमण्डयात ३–१ गोलं बुकाः नेदरल्याण्ड्सया आयाक्स एम्सटरडम नं राउण्ड अफ सिक्सटिनय् थ्यंगु दु ।

पुचःया मेगु कासाय् पोर्चुगलया स्पोर्टीङं टर्कीया बेसिक्तासयात ४–० गोलं बुकाबिल । च्याम्पियन्स लिगया मेगु कासाय् स्पेनया रियाल मड्रिडं युक्रेनया शख्तरयात २–१ गोलं बुकूबलय् इंग्ल्याण्डया म्यान्चेस्टर सिटीं बेल्जीयमया क्लब ब्रुजयात ४–१ गोलं बुकल ।

वंगु चान्हय् फ्रान्सया पिएसजीयात जर्मनीया आर.बी लाइप्जीगं २–२ गोलया ज्वलिंज्वलय् पंबलय् इटालीया इन्टरमिलानं मल्दोभाया शेरिफ तिरास्पोलयात ३–१ गोलं ल्यूने लाकाबिल ।

Categorized in कासा