मनसुनी ताःहाः जुइगु सम्भावना
लहना न्यूज | ने.सं. ११३९ ञलागा सप्तमि (२१ सेप्टेम्बर, २०१९), सञ्चरवाः
नेपालय् मनसुन अन्त्य जुइगु ई न्ह्यःने वयाच्वंगु इलय् मनसुनी न्यून चापीय रेखा औसत स्वयां छुं छुं दक्षिणपाखे न्ह्याःवंगुलिं मनसुनया ई अझ ताःहाः जुइगु सम्भावना दुगु जल तथा मौसम विज्ञान विभाग मौसम पूर्वानुमान महाशाखां न्ह्यथंगु दु ।
भारतया मध्य प्रदेशया उत्तर पश्चिमी भागय् व उत्तर प्रदेशया दक्षिणी भागय् छगू न्यून चापीय प्रणाली विकसित जूगुलिं अझ हे वा वइगु सम्भावना दुगु मौसमविद् शान्ति कँडेलं धयादीगु दु । वय्कलं मनसुनया ई ताःहाः जूसां नं तसकं वा वइगु सम्भावना मदुगु व चिहाकःगु इलय् हल्कानिसें मध्यम वर्षा जुइगु नं धयादिल ।
चान्हय् देसया मध्य व पूर्वी भूभागय् सामान्यनिसें पूवंक बदली जुयाः छुं छुं थासय् नँ न्याइगु व मलः जुइगुलिसें हल्कानिसें मध्यम वर्षाया सम्भावना दुगु मौसम पूर्वानुमान महाशाखां न्ह्यथंगु दु ।
आइतवाःनिसें देय्न्यंक सामान्यनिसें पूवंक बदली जुयाः देसया अप्वः धइथें थासय् नँ न्यानाः हल्कानिसें मध्यम वर्षाया सम्भावना दुगु धाःगु दु । अथे हे, सोमवाः देय्न्यंक सामान्य बदली जुयाः छुं छुं थासय् नँ न्याइगु व मलः जुइगुलिसें हल्कानिसें मध्यम वर्षाया सम्भावना दुगु व पूर्वया पहाडी लागाय् छगू निगू थासय् तसकं वा वइगु सम्भावना दुगु नं जल तथा मौसम पूर्वानुमान महाशाखां न्ह्यथंगु दु ।
अथे हे, महाशाखां वइगु २४घौया पूर्वानुमान जारी यासें देसया मध्य व पूर्वी लागाय् छुं छुं थासय् व पश्चिमी लागाया छुंछुं थासय् नँ न्याइगु व मलः जुइगुलिसें हल्कानिसें मध्यम वर्षाया सम्भावना दुगुलिं पहाडी लागाय् चलः वनेफूगु व खुसिया लःया बहाव अप्वइगु सम्भावना दुगुलिं सतर्कता नालेत नं इनाप याःगु दु ।
Categorized in राष्ट्रिय
