मन्त्रीया च्यूतालं वैदेशिक लजगाय् वनेत्यंपिं ठगीपाखें ल्यन
कछलागा षष्ठी ११४२, मंसीर ९ बिहीवाः
विभागीय मन्त्रीं चिउता क्यंबलय् वैदेशिक लजगाय् वनेत्यंपिं ल्याम्हत एजेन्टया ठगीपाखें ल्यंगु दु ।
भाषा परीक्षा उत्तिर्ण याना कोरिया वनेगु झ्वलय् दूपिं ल्याम्हतयेत एजेण्टं अबैध पहःलं ध्यबा असुल यायेत स्वःगु सूचं चुलायेधुंका श्रम, रोजगार तथा सामाजिक सुरक्षा मन्त्री कृष्णकुमार श्रेष्ठं थथें पहल कदमी क्यंबलय् ल्याम्हत ठगे जुइगु पाखें ल्यंगु खः ।
मंगलबाः चान्हय् थःपिन्त चूलागु सूचंया लिधंसाय् वयेक सुरक्षाकर्मी, श्रम विभागया अधिकारीलिसें पीडित ल्याम्हत तयातःगु होटलय् थ्यंकादीगु खः । कोरिया वनेत्यंपिं आपालं ल्याम्हतयेत अनिवार्य ७न्हूया क्वारेन्टीन च्वनेमाःगु धका जबर्जस्ती होटलय् तयातःगु खः । पीडितया कुँख्यना न्यनेधुंका मन्त्री श्रेष्ठं होटलय् बन्धक दयेकेगु ज्याय् दुथ्यापिन्त कारवाही यायेत निर्देशन बियादीगु खः ।
वैदेशिक लजगाय् वनिपिं ल्याम्हतयेसं फयेमाःगु समस्याया खँय् थप छानविन जुइगु व भविष्यय् थुकथंया दुःख फयेम्वालिगु लकस निर्माण यायेगु आवश्वासन नं वयेकलं बियादील ।
पीडित ल्याम्ह शंकर नेपालं होटल सञ्चालकं जबर्जस्ती अप्वः ध्यबा असुल यायेधुंका मन्त्रीतक्क सूचं थ्यंकाःगु धयादील ।
