२०८० चैत्र १६, शुक्रबार

मन्त्री जुयेवं उपप्रधानमन्त्री महतो विवादीत

कछलागा एकादशी ११४१,जेष्ठ २३ आईतवाः

जनता समाजवादी पार्टीया नेता अले नवनियुक्त उपप्रधानमन्त्री तथा शहरी विकासमन्त्री राजेन्द्र महतोया न्वचू विवादीत जूगु दु । प्रधानमन्त्री केपी शर्मा ओलीया सरकार ल्यंकेत आःया सरकारय् दुथ्याःम्ह उपप्रधानमन्त्री महतों बहुराष्ट्रया नितिं वकालत यायेवं उकिइ सत्तारुढ दल नेकपाया नेतातय्सं हे आपत्ति क्यंगु दु ।
 
शुक्रवाः सपथ नःगुलिसे वय्कलं नेपाःया बहुराष्ट्रिय राज्य दयेकेगु मुक्ति आन्दोलन आः न न्ह्याकाच्वनेगु धकाः न्वचू बियादीगु खः । उगु हे न्वचूयात कयाः म्हिगः न बहुराष्ट्रिय राज्यया नितिं आन्दोलन यानाच्वनेगु धयादीगु खः ।
 
जनता समाजवादी पार्टीया ज्याकुथी म्हिगः ग्वसाःग्वःगु लसकुस ज्याझ्वलय् वय्कलं नेपाः न्ह्याब्लें एकल राज्य जुयाः च्वनेमफइगु धयादीगु खः । उपप्रधानमन्त्री जूगुनाप शुक्रवाः सनिलय् पदवहाली यायेगु झ्वलय् नवाःगु खँ म्हिगः न लिसकयादीगु खः । नेपाः एकल राज्य मजूसें बहुलतां जाःगु विविधता दुगु राज्य खःगु उपप्रधानमन्त्री महतों धयादीगु खः । थःगु पार्टी कांग्रेस व कम्युनिष्ट थें मखुगु धासें कांग्रेस व कम्युनिष्टतय्सं याये मफुगु ज्या यायेत थःपिन्सं पार्टी नीस्वनागु धयादीगु खः । थःपिनिगु प्राथमिकता व दायित्व पार्टीया मूल्य–मान्यता खःगु धासें उपप्रधानमन्त्री महतों थःपिन्सं उकियात २४घौयंकं याद यानाच्वनेगु धयादीगु दु । 
 
थुखे नेकपा एमालेया नेता बामदेव गौतमं नवनियुक्त उपप्रधानमन्त्री राजेन्द्र महतों नेपाःयात बहुराष्ट्र व बहुराज्य दयेकेगु धकाः ब्यूगु न्वचुलिइ विरोध यानादीगु दु । नेता गौतमं महतोया न्वचुलिइ प्रधानमन्त्री केपी शर्मा ओली सुम्कच्वंगुप्रति थः अजू चायागु न धयादिल । संविधानया मर्म अःखः ज्या मयायेगु धकाः शपथ नःगु बाघौलिपा नेपाःयात बहुराष्ट्र व बहुराज्य दयेकेगु मुक्ति आन्दोलन न्ह्याकेगु धकाः ब्यूगु न्वचुलिं थःत दुःखी याःगु नेता गौतमं उल्लेख यानादीगु दु ।
 
उपप्रधानमन्त्री महतों आः न न्ह्याकाच्वंगु कथित आन्दोलनं नेपाःयात विखण्डन यायेगु स्वयां मेगु मजुइगु धकाः गौतमं द्वपं बियादिल । अथेजुयाः देय् विघटन याइगु आन्दोलन थःगु नितिं स्वीकार्य मजुइगु धयादीगु दु । अथेहे एमालेया युवा नेता योगेश भट्टराई व गोकर्ण विष्टं न उपप्रधानमन्त्री महतोया न्वचू अराजक व संविधानविरोधी जूगु प्रतिक्रिया बियादिल । राज्यया जिम्मेवार पदय् थ्यंम्ह मनूं भौगोलिक अखण्डता व राष्ट्रिय हित प्रतिकूल न्वचू ब्यूगु दुर्भाग्यपूर्ण जूगु वय्कपिनिगु धापू दु ।
 
नेवाः पत्रकार राष्ट्रिय दबूं कोरोना संक्रमित दबूलय् आबद्ध पत्रकारयात ग्वहालि यायेत कोभिड दु्रत प्रतिकार्य पुचः गठन याःगु दु । पत्रकार राष्ट्रिय दबूया केन्द्रीय समितिया मुँज्यां उगु निर्णय याःगु खः । पत्रकार राष्ट्रिय दबूया दाँबह्री सुरेन्द्रभक्त श्रेष्ठया कजिसुइ गठित समितिइ ल्यु दाँबह्री बाबुकाजी साछेँ श्रेष्ठ, विराजकाजी राजोपाध्याय, विगेन तुलाधर, अनुप प्रधान, पूर्णभक्त दुवाल व सुनीता डंगोल दुथ्यानादी । पुचःलं कोरोना संक्रमित पत्रकारयात राहत, पौष्टिक आहार व आर्थिक ग्वहालि याइगु कजि श्रेष्ठं जानकारी बियादीगु दु ।
 
थ्वहे दथुइ पत्रकार राष्ट्रिय दबूं कोरोना संक्रमणया हुनिं मातृशोक, पितृशोकय् लाःपिं पत्रकारयात शनिबाः छगू भर्चुअल मुँज्यापाखें श्रद्धाञ्जली सभाया ग्वसाःग्वया विचाहायेकुगु दु । कोरोना संक्रमणया हुनिं नेपाःया हे न्हापांगु सन्ध्याकालीन न्हिंपौ विश्वभूमीया सम्पादक सुशीलवीरसिंह कंसाकार, पत्रकार राष्ट्रिय दबूया पूर्व केन्द्रीय दुजः राजेन्द्र शाक्यया माँ व अबु, काठमाडौ शाखाया नायः अविन्द्रमान सिंहया माँ इन्द्रमाया सिं, दुजः शरणहरि डंगोलया माँ श्रीमाया डंगोल, व यलः शाखाया दुजः गुणराज शाक्यया माँ बेखामाया शाक्य मदूगु खः ।
 
उगु सभाय् पत्रकार राष्ट्रिय दबूया केन्द्रीय नायः सुरजवीर बज्रँचार्यं मदूपिनि छेँजःंप्रति विचाहायेकुगु खः  । नायः बज्राचार्यं थुगु दुःखद इलय् आर्थिक स्तर कमजोर जूपिं छेँजःयात ग्वहालि यायेगु तयारी जुयाच्वंगु धयादील । उगु झ्वलय् सचिव कृष्णकाजी मानन्धर केकें प्रतिकार्य पु्चःलं यायेत्यंगु ज्याखँया बारे जानकारी बियादीगु खः ।
Categorized in राजनीति