महाकबिया बुदिं हन
लहनान्युज | गुंला थ्व षष्ठि ११३७ (जुलाई २९ २०१७)
सिद्धिदास प्रतिष्ठान ख्वपया ग्वसालय् महाकबि सिद्धिदास अमात्य ‘महाजु’या सच्छि व ५० या लसताय् ‘सिद्धिदास महाजुया थी थी चिन्तन’ छगु ज्याझ्वः जुगु दु।
उगु ज्याझ्वलय् प्रा.डा. योगेन्द्र प्रधान व उपप्राध्यापक रबि शाक्यं महाजुया नेपालभाषा व साहित्यया पुनर्जागरण ईलय् विकास यायेगु लिइ तंधःगु योगदान दु धकाः कनादिल।
उगु ज्याझ्वलय् प्रा.डा. तुयुबहादुर महर्जनं ‘सिद्धिदास महाजुया साहित्य बर्णबिन्यास ब्यवस्था’ बिषयलय् कार्यपत्र न्ह्यःब्बयादिगुलि ओमकार श्रेष्ठं टिप्पणी याना दिगु खः। ‘महाकबि महाजुया कृतिइ मिसातय्गु धारणा’ बिषयया कार्यपत्र प्रा.डा.चुन्दा बज्राचार्य न्ह्यःब्बयादिगु खः। उगु कार्यपत्रय् प्राज्ञ धुब्र मधिकर्मि टिप्पणी यानादिगु खः।
अथेहे प्रा.डा. योगेन्द्र प्रधानं ‘सिद्धिदास महाजुया बिबिध बिचार’ या कार्यपत्रय न्ह्यःब्बयादिगु खःसा उगु कार्यपत्रय् साहित्यकार त्रिरत्न शाक्यं टिप्पणी यानादिगु खः। मेगु कार्यपत्र उपप्राध्यापक रबि शाक्यं ‘सज्जन हृदयभरण नांया महाकाब्यय् संस्कृति नीति साहित्यया प्रभाव’या कार्यपत्रय् साहित्यकार गोबिन्दमान श्रेष्ठं टिप्पणी यानादिगु खः।
उगु ज्याझ्वलय् बाम बुद्धिजिबि प्रा.माणिकलाल श्रेष्ठ, नेवाः न्ह्यलुवा मल्ल के सुन्दर, प्रतिष्ठानया नायः नरेन्दभक्त हाडा, सचिब अमररत्न बज्राचार्य, दुजः बिमल प्रधान, व शान्ति निकेतनया प्रअ महेन्द्रगोपाल कर्माचार्य पिन्सं महाकबि महाजुया साहित्यक योगदानया बिषय् थःथगु नुगः खँ तयादिगु खः।
