महानगरयात ‘हेल्दी सिटी’ दय्केगु घोषणा
जुजुमान महर्जन
येँ महानगरपालिकायात थीथीकथंया ‘सिटी’ दय्केगु घोषणाया नापनापं आः हाकनं येँ महानगरपालिकाया प्रमुखं थुगु महानगरपालिकायात ‘हेल्दी सिटी’ दय्केगु घोषणा याःगु दु । मानवया स्वास्थ्यय् लाकाच्वंगु धुम्रपान व सूर्ति सेवनयात निषेधित याय्गु तातुनां महानगरपाखें उकथंया घोषणा जूगु खः । थ्व छगू च्वछाय्बहःगु घोषणा खः ।
विश्वय् स्वय्गु खःसा दकलय् अप्वः मिसापिन्सं धुम्रपान याइपिनिगु धलखय् नेपाः न्ह्यःने लाः । अथे ला मिजंपिं नं धुम्रपान याइपिं म्हो मजू । खः, थुकिं मानवया स्वास्थ्यय् बांमलाःगु लिच्वः लाकाच्वंगु दु, गुकिं यानाः नेपालय् दँय्दसं क्यान्सर, दमथें जाःगु दीर्घकालीन ल्वचं कयाच्वंपिं मनूतय्गु ल्याः अप्वः जुजुं वनाच्वंगु दु । थ्व स्वास्थ्य लागाय् छगू तःधंगु हाथ्याः कथं न्ह्यःने दं वयाच्वंगु दु ।
धुम्रमान निषेधित याय्गु नितिं वा थुकिया सेवन याइपिं न्यूनीकरण याय्गु नितिं थी थी कथंया नीति सरकारं हःगु दु । सरकारं २०४९ सालं निसें थुकियात निरुत्साहित याय्गु नितिं थु कथंया नीति हःगु खःसा उकिया प्रभावकारी कार्यान्वयन जुइफूगु मदुनि । छुं दँ न्ह्यःजक धुम्रपान लिसें सूर्तिजन्य पदार्थ मीगु नितिं सरकारया अनुमतिपत्र काय्माःगु व्यवस्था याय्गु घोषणा याःगु खः ।
उकियात कयाः सरकारी स्तरं अनुगमन यानाः व्यापारी तय्त हतोत्साही याःगु खः, गुगु बांलाःगु पक्ष खः । तर व थौकन्हय् थुगु ज्या छु जुयाच्वन धकाः न्ह्यसः तःसा नं लिसः धाःसा मदु । आः महानगरपालिकां मेगु महत्वाकांक्षी योजना न्ह्यःने हःगु दु । तर थ्व घोषणाय् जक सीमित जुइगु खः ला धइगु ग्याचिकु नं उलि हे दु ।
येँ महानगरया तःधंगु समस्या धइगु धू खः । धुलं यानाः महानगरवासी पिनिगु स्वास्थ्यय् बांमलाःगु लिच्वः लाकाच्वंगु दु । थुकियात हे बिचाः यानाः जुइमाः, महानगरया प्रमुखं महानगरयात धू पाखें मुक्त याय्गु घोषणा याःगु खः । थुकिया कार्यान्वयनया झ्वलय् थाय् थासय् धू मुनेगु नापं थुलि टन धू मुन धकाः बुखँ नं पिहांवल ।
तर धू नियन्त्रण याय्गु स्वयां धू गुकथं उत्पादन जुयाच्वंगु दु, वा कारण छु खः धइगु खँय् धाःसा गबलें नं च्यूताः तःगु खनेमदु । थौंकन्हय् स्वय्गु खःसा महानगरपाखें थुगु क्षेत्रय् ज्या यानाच्वंगु आभास मानगरवासीयात बी फयाच्वंगु मदु । अर्थात थनया जनतात अझ नं धू नयाः स्वास्थ्यय् लिच्वः लाकाच्वनेमाःगु हे अवस्था दु ।
आः महानगरं हाकनं जनताया स्वास्थ्ययात ध्यान् तयाः धुम्रपान व सूर्तिजन्य पदार्थ सेवनय् निषेधित याय्गु घोषणा यानाः महानगरयात ‘हेल्दी सिटी’ दय्केगु म्हगस खनाच्वंगु दु । बांलाःगु अले महत्वाकांक्षी म्हगस खनेगु बांमलाःगु मखु, तर घोषणा ‘घोषणा’य् जक सीमित मजुइमा ।
