महानगरया समृद्धिया लागि क्षमताया उपयोग यायेमाः, मेयर शाक्य
नृपेन्द्रलाल श्रेष्ठ | गुंलाथ्व द्धितीया ११४०,साउन ७ बुधवाः
येँ महानगरपालिकाया मेयर बिद्यासुन्दर शाक्यं विभागीय व महाशाखा प्रमुखपिन्त प्रभावकारी व परिणाममुखी ज्यायेत इनाप यानादिगु दु । आर्थिक बर्ष २०७६÷०७७ या बार्षिक समीक्षा ज्याझ्वलय् न्ववानादिसे मेयर शाक्यं थःथे इनाप यानादिगु दु । ‘बार्षिक बजेट, नीति तथा कार्यक्रमय् उल्लेख जूगु व थः नाप सम्बन्धित ज्याया इलय् सम्पादन यायेगु छिकपिनिगु दायित्व खः,’ धयादिसे, ‘महानगरबासी, कर्मचारी व जनप्रतिनिधि दथुइ आत्मीय सम्बन्ध बिकास यायेगु व समन्वययात प्रभावकारी दयेका लिच्वः वइगु कथं ज्या यायेमागु खँय् बःबियादिगु दु ।’
मेयर शाक्यं येँ महानगरपालिकाया कर्मचारीपि नाप मेपि स्थानीय तह सञ्चालनया बिषयय् थीथी स्थानीय तहय् वना प्रशिक्षण न्ह्याकेगु व क्षमता थःगु ज्याकुथिइ न क्यनेगु सुझाव बियादिगु खः । ‘थन अधिकांश कर्मचारी क्षमतावान दुगु धयादिसे महानगरया समृद्धिया लागि थःगु क्षमताया उपयोग यायेत धयादिगु खःं ।’ मेयर शाक्यं, ‘जितः नीति चित्त बुझे मजू, कार्यक्रम चित्त बुझे मजू, जि थ्व ज्या याये मखु धका कर्मचारीं याये मज्यू धका धयादिसे सार्वजनिक सेवा प्रवाह यायेत सहज व सर्वसुलभ ढंगं प्रवाह यायेमाः धका धयादिगु दु ।’
उगु ज्याझ्वलय् सामाजिक बिकास बिभाग, प्रशासन बिभाग, सम्पदा तथा पर्यटन बिभाग, सहरी पूर्वाधार बिकास बिभाग, बित्त बिभाग, सहरी शुशासन बिभाग, वातावरण व्यवस्थापन बिभाग, सूचना प्रबिधि बिभाग, भवन इजाजत बिभाग, बिपद् व्यवस्थापन बिभाग, सहकारी बिभाग, शिक्षा बिभाग, कृषि बिभागं प्रगति समिक्षा प्रस्तुत याःगु खः ।
अथेहे कानून महाशाखा, अन्तर्राष्ट्रिय सम्बन्ध व मेयरया सचिवालय, सार्वजनिक निजी साझेदारी इकाइ, आन्तरिक लेखा परीक्षण शाखा, नगर प्रहरी महाशाखा, मनोहरा जग्गा बिकास आयोजना, चमती नयाँबजार जग्गा बिकास आयोजना, खरिद इकाइ, हनुमान ढोका दरवार संरक्षण कार्यक्रम, पशु महाशा, सहरी योजना आयोग, जनस्वास्थ्य महाशाखापाखे वार्षिक प्रगति समिक्षा प्रस्तुत याःगु खः ।
नाप भैरव बोगटीं संघ÷प्रदेश संसद बिकास कोष व दीपक अधिकारी — महालेखापाखे वःगु प्रतिवेदनया समिक्षा यानादिगु खः ।
उगु ज्याझ्वलय् उपमेयर हरिप्रभा खड्गी श्रेष्ठ, प्रमुख प्रशासकीय अधिकृत एकनारायण अर्याल, सहसचिव राजेश्वर ज्ञवाली, निर्देशक दिपक अधिकारी व उपनिर्देशक प्रल्हाद घिमिरे न थःथःगु खँ तयादिगु खः ।
