२०८० चैत्र १६, शुक्रबार

महामारी

मोतिशान्ति शाक्य
 
हे कोरोना छंगू विध्वंसकारी पलाखं
संसारयात इपः कंकल
जावा सुक्ष्म जीव जुया नं खरबौं मनूयात
छं त्रास व सन्तापया पुखुलिइ क्वफात
 
छंगु कुकृतिं लाखौं मनूयात बेरोजगार यानाः
संसारया अर्थ व्यवस्थाय् भ्वखाय् ब्वय्काबिल
ल्वय् व पित्याःया करुण क्रन्दनं राष्ट्रयात हे आक्रान्त यानाबिल
छं काःगु टक्करं भिटो पावरया कवच पुनातःपिंत नं ठक्कर नकल
मानब सभ्यता व विकासयात न ध्याकुनय् कुनाबिल
 
तर हे कुलांगार कोरोना
छंगु प्रकोपयात जिमिसं शक्तिइ हिले धुनागु दु 
छं ब्यूगु पीडां सिर्जनाया स्वां ह्वय्कागु दु
धनी,गरिव जिपिं फुक्कं छप्पं जुइधुनागु दु
पञ्जलय् च्वंपिं झंगः व खोरय् च्वंपिं पशुतय्गु
अनुभूतया सवाःनं जिमिसं फय्धुनागु दु ।
जीवनया मू गुलि थ्यं धैगु ल्याः नं जिमिसं च्वय्धुनागु दु ।
 
छंगु उदण्ड प्रकोपयात सखाप याय्त
संसारया महान वैज्ञाानिकत समर्पित जुइधुकूगु दु ।
याकन हे छन्त क्वतालय् तयाः दिपय् वाय्यंकेत 
 
चाकुपाट, यल ।