महामारीइ नं मेडिकल माफियाया हे धन्दा
नेपालय् न्हियान्हिथं कोरोनाभाइरस (कोभिड १९) संक्रमितया ल्याः अप्वयावनाच्वंगु दु । उकिया नापं स्वनिगलय् नं संक्रमितत लुया वयाच्वंगु दु । छुं ई न्ह्यः तकं स्वनिगः सुरक्षित दु धयाच्वंम्ह येँ महानगरपालिकाया मेयर विद्यासुन्दर शाक्यं नं आः वयाः स्वनिगःयात सुरक्षित धायेफइगु अवस्था मन्त धायेधुंकल ।
 
लिपांगु इलय् स्वनिगः दुने नं धमाधम संक्रमित खनेदयाच्वंगु दु । छखे स्वनिगः दुने खनेदयाच्वंगु दुसा मेखे पिने जिल्लायापिं नं गुलिखे संक्रमित स्वनिगलय् दुने हे च्वनाच्वंगु लुया वयाच्वंगु दु । थुकथं स्वनिगलय् दुने खनेदुपिं संक्रमितत अप्वः यानाः लकडाउनया इलय् हे स्वनिगलय् दुहांवःपिं खः धइगु खँ नं सीदया वयाच्वंगु दु ।
 
पिने जिल्लाय् जोखिम अप्वःगु धासें यक्व हे मनूत पास दयेकाः, तरकारी वा खाद्यान्नया गाडीइ जक मखु, एम्बुलेन्सय् च्वनां तकं स्वनिगलय् दुहांवःगु दु । थुकिया हे झ्वलय् स्वनिगलय् पिने जिल्लायापिं मनूतय्त चान्हय् चान्हय् सुनां मखंक त्वःता थकेगु ज्याय् मेडिकल माफियातयगु ल्हाः दुगु आशंका नं अप्वयावःगु दु । 
 
पिने जिल्लां म्हमसिउपिं मनूत दुहां वल धायेसातकि वयागु सम्पर्कय् वःपिं फुकस्यां कोरोना परीक्षण याये मालीगु अवस्थाय् थःपिनि स्वास्थ्य परीक्षण सम्बन्धी वासःत यक्व बिक्री जुइगु जूगुलिं स्वनिगलय् मनू ल्ह्ययेगु ज्याय् मेडिकल माफियात हे सुनियोजित रुपं जानाजूगु अनुमान जुयावःगु खः ।
 
विरामी ल्ह्ययेत आनाकानी याइगु एम्बुलेन्सतय्सं पिने जिल्लां हुलका हुल मनूत मुंकाः नं स्वनिगः दुने हयाच्वंगु खनेदयाच्वंगु दु । पिने जिल्लायापिं मनूतय्त स्वनिगः दुने हयेगु ज्याय् थौंकन्हय् थीथी अस्पताल व निजी क्षेत्रया एम्बुलेन्सत प्रयोग जुयाच्वंगु दु । मेडिकल माफियातय्गु पहुँच व सम्पर्कया आधारय् हे थ्व ज्याय् एम्बुलेन्सया समेत दुरुपयोग यायेफुगु सुत्रया धापू दु ।
 
थौंकन्हय् स्वनिगः दुने विरामी व उमि कुरुवातयत हयागु धकाः एम्बुलेन्सतयसं न्हिं ४०० म्ह मनूतयत स्वनिगः दुने हयाः त्वःतेगु यानाच्वंगु दु । एम्बुलेन्सतयसं अज्याःपिं मनूतयत अस्पतालय् त्वःतेगु मखुसें लँय् हे त्वःता थकेगु यानाच्वंगुलिं नं उमिसं थ्व ज्या सुंलिसे मिले जुयाः हे यानाच्वंगु खनेदु धकाः सूत्रं धाःगु दु ।
 
पिनें वःपिं मनूत गन गन च्वन धाल अन च्वंपिं मनूत तसकं आतंकित जुयाच्वंगु दुसा उपिं कोरोना परीक्षण यायेत थीथी स्वास्थ्य केन्द्रय् ब्वाँय् वनेत बाध्य जुयाच्वंगु दु । 
 
कोरोना परीक्षण यायेगु लागिं सरकारयाके माक्व साधन मदु । थ्व हे हुनिं इलय्ब्यलय् रेडजोनय् तकं किटया अभावय् परिक्षण दिकेमाले यः । थज्याःगु अवस्थाय् परीक्षण याकेमाःपिं मनूत बाध्य जुयाः निजी क्षेत्रया शरणय् वने मालीगु सम्भावना अप्वइ । थ्वहे इलय् निजी क्षेत्रय् पीसीआर कोरोना परीक्षण याकेगु खःसा १५,००० तका तुइ धकाः प्रचार नं याना हःगु दु । 
 
छखे पिनेयापिं मनूतय्त स्वनिगलय् त्वःतेहयाः आतंक सिर्जना यायेगु व मेखे कोरोना परीक्षणया मूल्य सार्वजनिक यानाः विज्ञापन यायेगु थ्व ज्या मेडिकल माफियातयसं हे सुनियोजित रुपं न्ह्याकाच्वंगु खँ विज्ञ सूत्रं धाःगु दु । 
 
पिनेयापिं मनूतय्त स्वनिगः दुने हयेगु क्रम तसकं अप्वल, उमित पने माल धकाः स्वनिगःया थीथी नगरपालिकातयसं छुं न्हि न्ह्यः मंकाः रुपं हे गृह मन्त्रालययात इनाप याःगु खः । स्वनिगःया निगू महानगरपालिका व १६गू नगरपालिकाया मंकाः संस्था उपत्यका नगरपालिका फोरमं अज्याःगु इनाप यायेवं गृह मन्त्रालयं आः स्वनिगलय् दुहां वयेत आरडीटी टेस्ट यानातःगु भ्वं क्यनेमाः धकाः न्हूगु नियम सार्वजनिक याःगु दु । 
 
तर गृहं सुचं छगू सार्वजनिक यानाः सुयातं कारवाही धाःसा मयाःगु कारणं पिनें दुहां वइपिंत नियन्त्रण याये मफयाच्वंगु खँ सीदुगु दु । म्हिगः छन्हुया दुने हे स्वनिगलय् थीथी कथंया सवारी साधन मार्फत २५०० म्ह मनू दुहां वःगु खँ प्रहरीं धाःगु दु । 
 
गृह मन्त्रालयपाखें जारी याःगु सुचंया पालना मयाइपिंत कारवाही यायेत नं सर्वसाधारणपाखें दबाब बिया हःगु दु । यदि गृहया नियम पालना मयासे पिनेयापिं मनूत दुहां वल व उमित
गृहपाखें नं छुं कारवाही मयात धाःसा स्थानीय जनता थःपिंसं हे कारवाहीया पलाः न्ह्याके माली धइगु ख्याच्वः नं आक्रोशित मनूतयसं बियाहःगु दु । पिनेयापिं मनूत स्वनिगलय् दुहां वयेधुंकाः उपिं गन वन, गन च्वन धइगु बारे गनं छुं अभिलेख मदुगु जुयाः उपिंपाखें तःधंगु खतरा उत्पन्न जुइगु आशंका समेत जुयाच्वंगु दु ।