२०८० चैत्र १५, बिहिबार

महासंघया नेतृत्व स्वनिगःयापिन्सं यायेगु ला ?

कछलाथ्व दशमि ११३७ (नोभम्बर १० २०१६)

 
नेपाल सुनचाँदी व्यवसायी महासंघया निक्वःगु महाअधिवेशन थ्वहे वइगु कछलाथ्व द्वादशि अथे धइगु कन्हय् शुक्रबाःकुन्हु जुइत्यंगु दु । लुँवहः व्यवसायीतयगु दक्कले तःधंगु संगठन थुगु महासंघया अधिवेशन वंगु भाद्र २४ व २५ गते यायेकथं क्वःछिनातःगु खःसा उगु महाअधिवेशन स्थगित जुयाः वइगु २६ गते जुइत्यंगु खः । थुगु अधिवेशनय् विशेष यानाः निम्ह उम्मेदवार माणिकरत्न शाक्य व मोहन सुनार नायःया नितिं दावेदारया कथं न्ह्यःने वयाच्वंगु खः । आःवयाः थुगु पदया नितिं सर्वसम्मतिं हे नायः ल्ययेगु ज्या लिपांगु चरणय् थ्यनाच्वंगु दु । तसकं प्रतिस्पर्धात्मक रुपं न्ह्याःवनाच्वंगु थुगु धेंधेंबल्लाः आः वयाः सर्वसम्मतिपाखें वनेमाःगु व थुकथंया लकस गुकथं ब्वलन धइगुलिसें थीथी विषयस महासंघया वर्तमान नायः मणिरत्न शाक्यलिसे लकसमान ज्यापुं यानादीगु खँल्हाबँल्हा न्ह्यब्वयाच्वना । 
 
नेपाल सुनचाँदी व्यवसायी महासंघया छिगु कार्यकाल गथे च्वन ?
 
वि.सं. २०६९ सालय् थुगु महासंघ पलिस्था जुल । महासंघ दर्ता यायेगु नितिं विधान तयार यायेगु लिसें फुक्क कथंया ज्या यायेगु नितिं जिगु हे संयोजनय् छगू तदर्थ समिति दयेकाः ज्या यानागु खःसा वंगु २०७० सालया थुगु महासंघया चुनावपाखें जितः नायः पदय् ल्यःगु खः ।
 
जिगु न्हापांगु कार्यकालय् ज्या यायेगु नितिं यक्व हे हाथ्यात दुगु खः । छगू हे प्यानलया मजूगु हुनिं नं ज्या यायेत भचा थाकुल । उगु इलय् नायः पदया नितिं जिलिसें माणिकरत्न शाक्य, मोहन सुनार, ज्ञानुराजा शाक्य यानाः मुक्कं प्यम्हेस्यां उम्मेदवारी ब्यूगु खः । लिपा वनाः निम्हेसिनं नां लित कायेवं माणिकरत्न व जि दथुइ धेंधें बल्लाः जूगु खःसा उकी जि निर्वाचित जुल । अथेहे महासंघया थीथी पदय् थीथी ब्यक्तिपिं ल्यःगु जुल ।
 
 
छिगु कार्यकालय् विशेष यानाः गजाःगु ज्या जूगु खनेदु ?
 
जिगु स्वदँया कार्यकालय् न्ह्यथनेबहःगु थीथी ज्या जूगु दु । विशेष यानाः लुँवहः व्यवसायया नितिं मापदण्ड निर्देशिका तयारी यायेगु ज्या जूगु दुसा आः थुकियात जारी यायेगु अवस्थाय् थ्यंगु दु । 
अन्तर्राष्ट्रिय मान्यताकथं हल मार्किङ्गया मापदण्ड तयार जुइधुंकूगु दु । तर थुकियात कयाः लागू यायेगु नितिं नं नेपालय् थीथी कथंया समस्या नापं थुकियात कयाः सरकार हे उदासिन जूगु व जिमिगु व्यवसाययात कयाः संवेदनशील मजूगु धाये वा अनुभूति यायेमफूगु, थजाःगु हुनिं छुंछुं समस्या ब्वलनाच्वंगु दु । 
 
निर्देशिका तत्काल लागू मजूसां तयारीं नं यक्व हे ज्या ब्यूगु खनेदु ।सरकारया अनुगमनपाखें यक्व हे धइथें मापदण्डकथं ज्या जुयाच्वंगु सीदु । थुगु मापदण्डया आधारय् ज्या जुयाच्वंगुलिं लिपा पूवंक हे लागू यायेगु नितिं आधार तयार जुयाच्वंगु दु धइगु थुकिं क्यनाच्वंगु दु । 
 
नेपाल सुनचाँदी व्यवसायी महासंघ, रत्न आभूषण महासंघ व हस्तकला महासंघ जानाः जेम्स एण्ड ज्वेलरी काउन्सिल दयेकेगु नितिं तदर्थ समिति दयेकेगु ज्या जुलसा नेपालय् हे नं नकतिनि थ्वहे स्वंगू महासंघ जानाः इन्टरनेशनल जेम्स एण्ड ज्वेलरी एक्स्पो यायेत ताःलाःगु दु ।
 
अथेहे जर्मनीया म्यूनिखय् जूगु अन्तराष्ट्रिय प्रदर्शनीइ नं झीसं ब्वति कया । मेखे विदेशी मुद्राया माग अप्वयाच्वनीगु इलय् झीथाय् दयाच्वनीगु लुँ हे छ्यलीगु खः । नेपालय् लुँ बजारय् वयेधुंकाः तनीगु धइगु खँ पिहांवयाच्वंगु दु । व धइगु नं नेपालय् विदेशी मुद्रा म्ह्वः जुइबलय् विदेशय् लुँ मियाः थुकथं न्यायेगु ज्या जुयाच्वंगु दु । थुगु महासंघ दयेधुंकाः थुकियात पनेत ताःलाःगु खनेदु । 
 
लुँवहः सम्बन्धि दयाच्वंगु थीथी भ्रामक प्रचार प्रसार लिसें वहःया आयात पूवंक हे निजी ख्यलं यायेगु ज्या नं जूगु दुसा बैंकपाखें लुँया आयात जुयाच्वंगुलि आः ५०गू प्रतिशत निजीपाखें यायेदइगु प्रावधानया नितिं नं ज्या न्ह्यानाच्वंगु दु । अथेखःसां थीथी समस्या ला यथावत हे दनि । थ्वहे झ्वलय् अमेरिकाया न्यूयोर्कय् नेपाःपाखें उत्पादन जूगु लुँवहःया तिसा प्रदर्शन यायेगु ज्या जुलसा उकिया प्रोमोशनल पार्टनरकथं थुगु महासंघपाखें ज्या जूगु नं छगू न्ह्यथनेबहःगु ज्या खः ।
 
 
महासंघया महाधिवेशन आः कार्तिकं जुइत्यन । न्हापा ला भाद्रं यायेगु क्वःछिनातःगु खः, उलबे छाय् जुइमफूगु वा मजुल ?
 
न्हापा जिमिसं महाधिवेशन भाद्रं यायेगु क्वःछिनातयागु खः तर विविध कारणं व इलय् महाधिवेशन मजुल । विशेष यानाः नायः पदया नितिं निम्ह उम्मेदवार कथं न्ह्यःने वयाच्वंपिं थःथःगु पक्ष बल्लाकेत जिल्ला जिल्लाय् ब्वाँय् वनाच्वन । थ्यंमथ्यं झिन्हु न्ह्यः जक कार्यसमितिया मुँज्या च्वनेत ताःलात । उकिंयानाः यायेमाःगु ज्या यायेत ई तसकं म्ह्वः जक जुल । 
 
 
विशेष यानाः प्रतिनिधि ल्ययेगु ज्या हे ल्यंदनिगु जुल । विधिवत रुपं दर्ता यानातःगु संस्थायात जक मान्यता बीगु खँ दुसां नेपालय् दर्ता हे मजूसें थःगु कथं यक्व हे लुँवहःया व्यवसाय यानाच्वंपिं दु । स्वनिगलं पिने यक्व हे दु । इमित थुगु महासंघय् दुथ्याकेगु वा दुमथ्याकेगु धइगु बहस नं जुल । निश्चित रुपं उपिं नं ला लुँवहःया व्यवसायीत हे खःनि । अथेहे मेमेगु प्राविधिक कारणं थुगु महाधिवेशन लिछ्यायेमाःगु अवस्था ब्वलंगु खः ।
 
 
छखे नायः पदय् निम्ह प्रत्यासी कथं नां न्ह्यःने वयाच्वंगु दुसा मेखे सर्वसम्मतिं ल्ययेगु नितिं नं ज्या जुयाच्वंगु दु धाइ, वास्तविकता छु खः ?
 
नायः पदया नितिं विशेषकथं निम्हेसिगु नां न्ह्यःने वयाच्वंगु दु । छम्ह माणिकरत्न शाक्य खःसा मेम्ह मोहन सुनार खः । पद दाबी यायेगु अधिकार ला निम्हेसिके नं दुगु हे खत । तर आः महासंघया नेतृत्व स्वनिगः दुने वा पिनेच्वंपिन्सं यायेगु खः धइगु अप्रत्यक्ष अस्वस्थ धेंधें बल्लाःया लकस ब्वलन । वरिष्ठ उपाध्यक्षया हैसियतं मोहन सुनार हे नायः जुइमाःगु खः, तर चुनावय् न्ह्याम्हं दनेदइगु ला अधिकार दइ । थजाःगु प्रचारं महासंघयात बांमलाःगु लिच्वः लाइगु अवस्था ब्वलंगु हुनिं महासंघयात छधी छप्पँ यायेगु नितिं थुकथंया ज्या न्ह्याकेमाःगु खः । 
 
 
अझ पिनेया जिल्लाय् ला स्वीदँया इतिहासय् नेतृत्व स्वनिगलं जक यानाच्वनेगु खःला धइगु कथंया सन्देश वनाच्वन । थुकिंयानाः जाति दथुइ हे कलह पिहांवइगु जक मखुला ? जाति दथुइ दयाच्वंगु सद्भाव जक स्यनीगु मखुला धइगु नं आशंका ब्वलंगु दु । थुकियात निराकरण यायेगु नितिं नं थुकथंया पलाः ल्ह्वनेमाःगु खः । 
 
अझ थजाःगु परिस्थितिइ समस्या ज्यंकेगु नितिं नं जितः हे विश्वास यानाः भाला ब्यूगु खः । पासापिनिगु ग्वाहालि व सद्भावं यानाः थ्यंमथ्यं थुकियात ज्यंकेत ताःलाःत धाःसां ज्यू ।
 
 
अथे धायेबलय् आः चुनाव जुइमखुत ?
 
आःया परिस्थितिइ स्वयेगु खःसा चुनाव मजुइगु हे खनेदु । निगुलिं पक्ष मिले जुयाः सहमतिइ वयेधुंकूगु दु । अथे जुयाः ज्याझ्वः नं छन्हु हे जुइगु जूगु दु । भलसा दु, आः वइगु न्हूगु नेतृत्वपाखें फुक्क लुँवहः व्यवसायीतयगु भावनायात कयेच्यानाः न्हू ढंगु ज्या न्ह्याकेत ताःलाइ । थ्वहे भिन्तुना नं बियाच्वना ।
 
 
दक्कले लिपा छुं धयादी कि ?
 
थगुने विनाशकारी भुखायया बाबजूद नं महासंघया ज्याखँत बांलाःगु हे दु धकाः फिडबायक वःगु दु । थ्व लसताया खँ खः । दक्व छधी छप्पँ जूगुलिं थुगु ज्या सम्भव दुगु खः । 
 
अथेहे लुँवहः व्यवसायीतयत सरकारपाखें जुयाच्वंगु समस्या, हक अधिकार नापं थीथी ज्याया नितिं छगू हे कुसा संगठनया नितिं नेपाल सुनचाँदी व्यवसायी महासंघ, हस्तकला महासंघ, रत्न आभूषण महासंघ जानाः सुनचाँदी महासंघया नितिं ज्या जुयाच्वंगु दु । आर्थिक समुन्न्तीया नितिं थ्व आवश्यक जू ।