माइतीघर मण्डलाय् नेवाः न्हयलुवा डा.महेशमानयात ज्वन
नृपेन्द्रलाल श्रेष्ठ | ११३९ तछलाथ्व सप्तमी (जुन ९ २०१९)
सरकारं गुथि ऐन विधेयक हयेत्यंगु विरुद्ध थौं आइतवाः जुगु माइतीघर मण्डलाय् थीथी संघसंस्था नाप सरोकारावालापाखें उगु ऐन खारेज यायेमाःगु माग यासें प्रदर्शन याःगु खः ।
उगु प्रदर्शन यायेगु ज्याझ्वलय् थौं माइतीघर मण्डलाय् लँ पनेत स्वःबलय् प्रहरीं लःया फोहरां क्ययेकूगु दुसा लाठी चार्ज तकं जुगु दु ।
उगु प्रदर्शन थौं १२ ताः निसे न्ह्याःगु खः । प्रदर्शनय झ्वलय् नेवाः न्ह्यलुवा डा.महेशमान श्रेष्ठ, अनिश श्रेष्ठ व बिकाश महर्जनयात ज्वना यंकुगु दु । वयकःपिन्त सिंहदरवारया पुलिश चौकि तयातःगु दु ।
थौं उगु प्रदर्शन यायेगु ज्याझ्वलय् थौं जुगु लाठी चार्जय् लाना महेश कारंजित कृष्ण मानन्धर व सजिव बज्राचार्य घाःपाः जुगु दु । घाःपाः जुपिन्त थापथलिया अन्नपुर्णं न्युरो हस्पितलय् वासः याका च्वंगु दु ।
थौं जुगु माइतीघर मण्डलाय् प्रहरी ब्यापक दमन याःगु दु । शान्ति पुर्वक धर्ना ज्याझ्वलय् लःया फोहरा तक छ्वाकिगु ज्या याःगु खः ।
गुथियारपिनिगु हक लाका कयाः गैर मनूतय्त गुथियार दयेकेफूगु लिसें गुथियारपिन्त कडा कानून लागू यानाः गुथि हे मदयेकेगु षडयन्त्र यायेत हःगु विधेयक धासें उगु विधेयक तत्काल खारेज यायेमाःगु माग थ्व इलय् छचाखेरं ल्ह्वनाच्वंगु दु ।
संसदय् थुगु विधेयकयात कयाः कन्हय् सोमवाःनिसें सहलह न्ह्याकेत्यंगु दु ।
किपा: बिकाश माली
