माकः,चखु,बखुयात नकेगु लागि मेयर शाक्यया टोली स्वयम्भू, बौद्ध व पसुपतिइ
नृपेन्द्रलाल श्रेष्ठ | चौलागा चतुर्थी ११४०, चैत्र २९ शनिवाः
कोरोना भाइरस (कोभिड–१९) या संक्रमण फैले मजुकेगु उदेश्यं सरकारं लकडाउन याःगु कारण येँ महानगरपालिकां खिचा, सा, माकः चखुबखुयात न नकेगु ब्यवस्था याःगु दु ।
येँ महानगरपालिकाया मेयर बिद्यासुन्दर शाक्यं थः हे स्वयम्भू, बौद्ध व पसुपतिइ वना नकेगु व्यवस्था याःगु खः ।
मेयर शाक्य नाप प्रमुख प्रशासकीय अधिकृत एकनारायण अर्याल, उपप्रमुख हरिप्रभा खड्गी (श्रेष्ठ), सहसचिव राजेश्वर ज्ञवाली, महानगरीय ट्राफिक प्रहरी महाशाखाया प्रमुख एसएसपी भीम प्रसाद ढकाल, प्रशासन विभाग प्रमुख नमराज ढकाल, महानगर प्रहरी प्रमुख धनपति सापकोटा लगायतपिन्स थौं स्वयम्भू, बौद्ध व पसुपतिइ वना नकेगु ब्यवस्था याःगु खः ।
अथेहे उगु पुचलय् सम्वन्धित वडाया वडाध्यक्ष नाप जनप्रतिनिधि न सहभागी दुगु खः । पुसपतिइ थ्यःगु इलय् पसुपति क्षेत्र विकास कोषया सदस्य सचिव डाक्टर प्रदिप ढकाललगायत पिनिगु सहभागी दुगु खः ।
माकः व चखुबखुयात नकेगु व्यवस्था यायेत विश्व सम्पदासूचिइ सुचिकृत जुगु थासय् वना मेयर शाक्यं इमिगु म्वायेगु अधिकारयात सुनिश्चित याये माःगु धका धयादिसे ४३ क्वःगु नगर कार्यपालिका बैठकं इमित नकेगु व्यवस्था यायेगु निर्णय जुगु व उगु कथं ज्या न्ह्याकगु धका जानकारी बियादिगु खः । ‘जिमिसं असाहय, अतिविपन्न व न्हिया न्हिथं ज्यायाइपिन्त राहत बिइत कोरोना भाइरस (कोभिड–१९) सम्वन्धी राहतवितरण मापदण्ड–२०७६ हे पारित याना मापदण्ड अनुसार राहत वितरण यायेगु निर्णय यानागु खः धका मेयर शाक्य धयादिगु खः ।
‘जिमिस चखुबखु, सा खिचा, माकः सु न नये मखना सिइ म्वाले म्वाः धका वडाय् हे बजेट छ्वया आहारया ब्यवस्था यानागु ख धका धयादिगु खः ।’
वडाय् उगु कथं बजेट पाखे नयेगु व्यवस्था याना वयाच्वनागु उगु कथं थौं माकः, खिचा सा यात विश्वसम्पदामा सुचिकृत सम्पदा थासय् स्वयम्भू, बौद्ध व पसुपतिइ वना अनुगमनया लागि वनागु जानकारी बियादिगु खः । ‘निर्णय जुगु कथं ज्या जुया च्वंगु दु मदु धका केन्द्रीय टोली अनुगमनया लागि वनागु धका धयादिगु खः, ‘महानगर दने सु न नये मखकं च्वने म्वाले म्वाः धइगु भावना कथं वडापिन्से सक्रिय रुपं ज्या याना च्वगु दु धका न धयादिगु खः ।’
वकयकलं कन्हय बसन्तपुर, कालमोचन लगायतया थासय् वना अनुगमन यायेगु जानकारी बियादिगु दु । शुक्रवाः तक ३२ गु वडापाखे करीब ३५ द्धः व च्यासःयात राहत वितरण यानागु जानकारीबियादिसे ४२ द्धः विवरण संकलन यानागु धका धयादिगु खः ।
