निर्वाचन आयोगं राष्ट्रिय सभा दुजःया १९ म्ह खाली दूगु पदया नितिं उम्मेदवारया मनोनयनपत्र दर्ता यायेत फुक्क तयारी पूवंकुगु दु ।

वइगु माघ १२ गते जुइगु उगु निर्वाचनया नितिं थौं सुथय् १०ता ई निसें न्हिने ३ ता ई तक्क उम्मेदवारया मनोनयन दर्ता जुइगु आयोगं न्ह्यथंगु दु । उगु निर्वाचनय् १२गू राजनीतिक दलं ब्वति कायेत्यंगु दु ।

आयोगं थ्वहे पुस २५ गते उम्मेदवारयात निर्वाचन चिं चूलाकिगु जूगु दु । वइगु फागुन २० गते नेकपा (एमाले) या ८म्ह , नेकपा (एकीकृत समाजवादी) या ४म्ह , नेकपा (माओवादी केन्द्र) या ४म्ह व नेपाली कांग्रेसया ३म्ह राष्ट्रियसभा दुजःया  पदावधि क्वचायेत्यंगुृ दु ।

दुजःया पदावधि क्वचाइगु ३५न्हू न्ह्यः हे निवार्चन यायेमाःगु प्रावधान दु । उगु निर्वाचनय् ९गू राजनीतक दलं फुक्क प्रदेशय् व ३गू दलं प्रदेश विशेषय् जक ब्वति कायेत्यंगु दु ।

आयोगया कथं , नेपाली कांग्रेस, नेकपा (एमाले), नेकपा (माओवादी केन्द्र), नेकपा (एकीकृत समाजवादी), राष्ट्रिय जनमोर्चा, नेपाल लोकतान्त्रिक पार्टी, जनता समाजवादी पार्टी, राष्ट्रिय प्रजातन्त्र पार्टी व नेपाल परिवार दलं फुक्क प्रदेशय् ब्वति कायेत्यंगु दु ।

लोकतान्त्रिक समाजवादी पार्टी प्रदेश नं दुई व सुदूर पश्चिम प्रदेश, नेपाल मजदुर किसान पार्टीं वाग्मती व ऐतिहासिक प्रजातान्त्रिक जनता पार्टी नेपालं प्रदेश नं २ लय् जक ब्वति कायेगु जानकारी बिउगु दु ।

Categorized in राजनीति