माझीपिन्स कोसी पर्व हन
लहनान्युज | चिल्लाथ्व पारु ११३९ (मार्च ७ २०१९)
मकवानपुरया बकैया गाउँपालिका ६ जुईनाया माझीपिंन्स थःपिनिगु तधःगु नखः लदी अर्थात् कोसी पर्व नेपाल माझी उत्थान संघ मकवानपुरया ग्वसालय् हने ज्या जुगु दु ।
माझी तयेगु बस्ती जुईना नापन्तुं बकैया, सिमात, हर्दिया व जुईना खुसिइ थःपिनिगु मौलिक पोशाकय् भेला जुया उगु खुसिइ दुगु,चोलेचा, खा व बखुँचा बलि बिया मंकाः कथं पुजा याना हने याःगु खः ।
उगु ज्याझ्वल बकैया गाउँपालिकाया अध्यक्ष दामोदर खनाल मूपाँहा कथं झायादीगु खःसा संघ अध्यक्ष आषिश माझीया सभाधक्ष्यताय् जुगु खःसा गाउँपालिकाया उपाध्यक्ष सरला बोलखे, माझी न्ह्यलुवा लक्ष्मी माझीया बिशेष पाँहा कथं झायादीगु खः ।
बकैया गाउँपालिका ६ नम्बर वडाया अध्यक्ष फूलमान भोम्जन, ४ नम्बर वडाअध्यक्ष राजन दंगाल, नेपाल कम्यूनिष्ट पार्टी(नेकपा)या स्थानीय नेता मोतीलाल सिंगारा, माझी मुक्ती मोर्चाया केन्द्रीय सदस्य कृष्णबहादुर माझी, तामाङ न्ह्यलुवा निरु थिङ पिनिगु न ब्बति दुगु खः ।
सांस्कृतिक ज्याझ्वलय् प्रतीक ब्लोन, पवित्रा माझी, संगम राई, लोकेन्द्र माझीपिन्सं म्ये हालादीगु खःसा जुईना समूह, जुरेली समूहं पाखे हुला प्याखँ न्ह्यब्बःगु खः ।
माझी समुदायया उत्थान व अधिकारया लागि योगदान बियादीपि पत्रकारपिं अशोकसुजन श्रेष्ठ, कृष्ण सारु मगर व माझी न्ह्यलुवा लक्ष्मी माझीपिन्त हने ज्या न याःगु खः ।
