मातृभाषाया पत्रकारिता बिकासया लागि राज्य हे पहल यायेमा
नृपेन्द्रलाल श्रेष्ठ | बछलाथ्व चर्तुदशी ११३८ (अप्रिल २९ २०१८)
नेपालभाषाया पत्रकारिता न्ह्यागु ९३ दँ दुगु लसताय् थौं आईतवाः स्वक्वःगु मातृभाषा पत्रकारिता दिवस हंगु दु ।
नेवाः पत्रकार राष्ट्रिय दबू केन्द्रीय समितियया ग्वसालय् वाङमय शताब्दी पुरुष नाप वरिष्ठ संस्कृतिविद् सत्यमोहन जोशीया मूपाहाँसुइ थौं यलय् धर्मादित्य धर्माचार्यया झ्वाताय् स्वामा देछासें छगु ज्याझ्वः जुगु दु ।
नेपाल संवत् १०४५, वि सं १९८२ बुद्ध जयन्ती कुन्हु भारतया कलकत्तापाखें धर्मादित्य धर्माचार्यं (जगतमान वैद्य ) बुद्ध धर्म व नेपालभाषा नां या पत्रिका प्रकाशन याना नेपाल भाषा पत्रकारिता न्ह्याकादीगु खः । धर्मादित्य धर्माचार्यंया सच्छि व झींस्वदँ क्वःगु बुदिंया लसताय् मातृभाषा पत्रकारिता दिवसया रुपय् दबूया ग्वसालय् स्वद दँ न्ह्यःनिसे यानावया च्वंगु खः ।
बुद्धधर्म व नेपालभाषा पत्रिका सम्भवतः गैर नेपाली भाषाया हे न्हापांगु प्रकाशित पत्रिका जुगु आतक ल्ुगु प्रमाणितं मातृभाषा पत्रकारिता दिवस नेवाः पत्रकार राष्ट्रिय दबूया केन्द्रीय अध्यक्ष श्रीकृष्ण महर्जन धयादीगु खः ।
उगु ज्याझ्वलय् मूपाहाँ वाङमय शताब्दी पुरुष नाप वरिष्ठ संस्कृतिविद् जोशीं नेपालया पत्रकारिताया दायरा तब्याकेत मातृभाषा पत्रकारितायात प्रर्वद्धन याये मागु धका धयादीगु खः । नाप धर्मादित्य धमाचार्यया बुद्धधर्म व नेपाल भाषाप्रति अनुरागं यागु पत्रकारिता आ व्यावसायिक धारय् न्ह्यावना च्वंगु धयादीसे थुकियात राज्यं साथ बिया ग्वहालि यायेमाःगु खँय् न बःबिया दीगु दु
नेपाल आदिवासी जनजाति पत्रकार महासंघया केन्द्रीय अध्यक्ष डण्ड गुरुङ्गं मातृभाषाया न्हापांगु पत्रकारया रुपय् धर्माचार्ययात राज्यं मान्यता बिया मातृभाषा पत्रकारिता दिवस हनेत माग यानादीगु खः । देय् संघीयता वना च्वंगु ईलय् विविध भाषा पत्रकारिताया विकासया लागि प्रदेश व स्थानीय तहं विशेष पहल याये माःगु खँय् अध्यक्ष गुरुङ्गं जोड बियादिल ।
अथेहे यलया क्षेत्र नं २ प्रदेशया सासंद् ज्ञानेन्द्र शाक्यं ३ नम्बर प्रदेशया नां “ ऐतिहासिक तथ्य व प्रमाणया आधारय् नेपालमण्डल तयेगु लागि सञ्चारकःमिपिन्स थःथःगु थासं बालाक्क भूमिका म्हितेत बःबियादिगु दु नाप प्रेस स्वतन्त्रताया हकय् तःधगु अभ्यासया लागि मातृभाषा पत्रकारिताया विकास जुइमाःगु धारणा तयादिल ।
ज्यापू समाजूया प्रथम उपाध्यक्ष सन्तमान महर्जन, ताम्रकार समाजया अध्यक्ष रवीन्द्रराज ताम्रकार पिन्सं न मातृभाषा पत्रकारिताया विकासया लागि राज्यं हे मातृभाषा पत्रकारिता दिवस हने माःगु खँय् जोड बियादिगु खः ।
