माल्दिभ्सय् जुइगु १३क्वःगु साफ च्याम्पियनसिप फुटबलया कासा धलः सार्वजनिक
गुंलाथ्व द्धादशी ११४१, भाद्र ३ बिहीवाः
माल्दिभ्सय् ग्वसाःग्वःइगु १३गूगु संस्करणया साफ च्याम्पियनसिप फुटबलया कासा धलः सार्वजनिक जूगु दु ।
दक्षिण एसियाली फुटबल महासंघं थौं कासा धलः सार्वजनिक याःगु खः । ५गू देय् दुथ्यागु साफ च्याम्पियनसिप अक्टोबर १ निसें १३ तक्क सञ्चालन जुइ । नेपालं ग्वसाःखलः माल्दिभ्सलिसे म्हिता धेंधेंबल्लाया शुरुवात याइ ।
नेपाः व माल्दिभ्स दथुया कासा अक्टोबर १ य् मालेस्थित राष्ट्रिय फुटबल स्टेडियमय् जुइ । नेपालं निगूगु कासाय् श्रीलंकालिसे अक्टोबर ३ य् म्हितिइ । ३गूगु कासाय् नेपालं भारतलिसे अक्टोबर ८ व लिग चरणया लिपांगु कासाय् बंगलादेशलिसे अक्टोबर १०य् म्हितिइ ।
धेंधेंबल्लाया लिग चरणया कासालिपा शीर्ष निगू टोलीं उपाधिया नितिं अक्टोबर १३ य् धेंधेंबल्ला याइ । साफ च्याम्पियनसिपया नितिं नेपालं मुख्य प्रशिक्षक अब्दुल्लाह अलमुताइरीया नेतृत्वय् पोखराय् तयारी यानाच्वंगु दु ।
आः बन्द प्रशिक्षणय् २८ म्ह कासामि दुथ्यागु दु । साफ च्याम्पियनसिप न्ह्यः नेपालं भारतलिसे निगू मैत्रीपूर्ण कासा नं म्हिते त्यंगु दु । त्रिपुरेश्वरस्थित दशरथ रंगशालाय् जुइगु कासा भदौ १७ व १८ गते जुइ ।
Categorized in कासा
