मिडिया काउन्सिल विधेयकयात कयाः पूर्व प्रधानमन्त्री खनाल असहमत
लहनान्युज | ने.सं. ११३९ बछलागा २ (२० मे, २०१९), सोमवाः
नेपाल कम्युनिष्ट पार्टी (नेकपा)या नेता झलनाथ खनालं मिडिया काउन्सिल सम्बन्धी विधेयकया प्रावधानयात कयाः असहमति प्वंकादिसें पत्रकारतसें यानाच्वंगु आन्दोलन गलत मजूगु धयादीगु दु ।
गृह जिल्ला इलाम वनेगु झ्वलय् थौं सोमबाः झापाया विर्तामोडय् पत्रकारलिसे खँल्हानादिसें नेता खनालं उगु खँ धयादीगु खः । वय्कलं उगु आन्दोलनं प्रेस स्वतन्त्रतायात स्थापित व प्रेसयात मर्यादित दयेकेगु नितिं बहस न्ह्याःगु नं धयादीगु दु । नेपाःया संविधानं ब्यूगु हक छुं नं त्वहः तयाः कुण्ठित यायेमफइगु नेता खनालया धापू खः ।
‘संविधानं प्रेस स्वतन्त्रताया गुगु परिकल्पना याःगु दु, व परिकल्पना स्वयां पिने सरकार वने फइमखु । जिमिसं सरकारयात उकथं न्ह्याके बीमखु ।’ पूर्व प्रधानमन्त्री खनालं धयादिल । वय्कलं आः पार्टीं न्हूगु कार्यदिशा, नीति व सिद्धान्त नं याकनं सार्वजनिक यायेगु जानकारी बियादिल ।
Categorized in राजनीति
