२०८१ जेठ १२, शनिबार

मिडिया काउन्सिल विधेयक परिमार्जन यायेमाः : नेकपाया नेता नेपाल

ने.सं. ११३९ बछलागा षष्ठि (२५ मे, २०१९), सञ्चरवाः

नेपाल कम्युनिष्ट पार्टी (नेकपा)या वरिष्ठ नेता माधवकुमार नेपालं मिडिया काउन्सिल विधेयक परिमार्जन यायेमाःगु धयादीगु दु ।
 
 
नेपालगञ्जय् सञ्चारकःमितलिसे खँल्हानादिसें पुलांम्ह प्रधानमन्त्री तकं जुयादीम्ह नेता नेपालं उगु खँ धयादीगु खः । वय्कलं विधेयकयात कयाः यक्व नकारात्मक खँ पिहां वयाच्वंगु नं धयादिल । संसदय् दर्ता जूगु विधेयक फुक्कसित मान्य जुइकथं परिमार्जन जुइमाःगु नेता नेपालया धापू खः ।
 
 
नेता नेपालं धयादिल, ‘विवाद व विमत्ति दयाच्वंगु अवस्थाय् थुगु विधेयकयात पास यायेमज्यू । विवादास्पद जुयाच्वंगु विधेयक हयेगु खँ मजुइमा, थुकियात फुक्कस्यां अपनत्व महसूस जुइकथं न्ह्यःने यंकेमाः ।’
 
 
विधेयकयात सहलह व सुझावलिसे संशोधन यायेमाःगु नेपालया धापू दु । ‘प्रेस स्वतन्त्र जुइमाः, गनं छुंपाखें प्रेसयात अंकुश तयेगु ज्या बांलाःगु मखु, थुखेपाखें सरकारं ध्यान बी ।’ नेता नेपालं धयादिल, ‘फुक्कस्यां अपनत्व महसूस जुइकथं विधेयक हःसा थुकिं ज्याखँ अझ अप्वः लोकंह्वाइ ।’
Categorized in राजनीति