मिडिया काउन्सिल विधेयक पारित जुइमखु : नेकपाया प्रवक्ता श्रेष्ठ
लहनान्युज | ने.सं. ११३९ बछलागा षष्ठि (२४ मे, २०१९), शुक्रवाः
सत्तारुढ नेपाल कम्युनिष्ट पार्टी (नेकपा)याा सचिवालय दुजः नापं प्रवक्ता नारायणकाजी श्रेष्ठं प्रेसयात कुण्ठित यायेगुकथं हःगु मिडिया काउन्सिल विधेयक पारित मजुइगु धयादीगु दु ।
येँय् थौं शुक्रवाः राष्ट्रिय मानव अधिकार प्रतिष्ठानं याःगु छगू ज्याझ्वलय् प्रबक्ता श्रेष्ठं उगु खँ धयादीगु खः । वय्कलं यथास्थितिइ मिडिया काउन्सिल विधेयक पारित मजुइगु दावी यानादिल ।
‘आः गुगु विधेयक वःगु दु, जिं दावी यानाः धयाच्वना कि यथास्थितिइ थ्व पारित जुइमखु ।’ श्रेष्ठं धयादिल, ‘विधेयकय् परिमार्जन जुइ ।’ प्रेसयात कुण्ठिट याइगु छुं नं प्रावधान तयाः पारित मजुइगु श्रेष्ठया धापू खः । विधेयकयात कयाः व्यापक सहलह यायेमाःगु नं वय्कलं धयादिल ।
विधेयकय् दुगु निगू प्रावधान चीकेमाःगु नं श्रेष्ठं धयादिल । ‘विशेष यानाः सरकारी कर्मचारीया प्रतिनिधित्व अप्वः जुइकथंया व्यवस्था याइमखु ।’ वय्कलं धयादिल, ‘थुकियात कयाः सहलह जुइ । न्यायाधीश नं थः हे जुइ धइगु मज्यू । थ्व विधेयक परिमार्जन जुइगु खँय् जितः विश्वास दु ।’
सरकारं संसदय् बैशाख २६ गते मिडिया काउन्सिल विधेयक दर्ता यायेधुंकाः नेपाल पत्रकार महासंघ, नेपाल प्रेस युनियन, प्रेस संगठन नेपाल, २१म्ह सम्पादकतसें विधेयक लित कयाः सहलह यायेत इनाप याना वयाच्वंगु खः ।
Categorized in राजनीति
