२०८० चैत्र १६, शुक्रबार

मिनि ध्याचू फन्टुस गफ

सुधीर ख्वबि
गफ यक्व याय्माःम्हेसिगु नितिं कथुइ कफ थाःसां वं गफ याय् त्वःतिमखु । आखिर जमाना हे गफय् यग्गानाच्वंगु दु । सत्य खँ ल्हाइपिनिगु स्वयां असत्य खँ ल्हाइपिनिगु वर्चस्व दु । थ्व खँ भाषा साहित्यय् जक मखु, समाजय् जक मखु, राजनितिइ जक नं मखु । मनूया हिनू हिनुली क्वँय् क्वँचय् जक मखु छ्यंगुया चिम्स प्वालंनिसे गफ पिहांवयाच्वनि । 
 
 
गफ याइम्हेसिगु गफ थुलि स्मार्ट नक्सां मेट्रोया स्पीडय् पिहां वइ कि व गफ गालय् कुतुंवनाः धलं बाःवनाः बेपत्ता जूसां व गफ ल्ह्वइगु च्वापुका म्हुतु, म्हुतु च्वसंया ग्वाय् ग्वाचय् च्वसंया च्वामु न्हाय् धरग्वारा थें क्वःदया थुत्था जूसां वं गफ याय् त्वःती मखु । 
 
 
छ्म्ह गफाडी राष्ट्रियता ,देशभक्ती व सर्वभौमयात ग्याँस सिलिन्डर दुने सुचुकाः प्यार्टुलया जर्किनयात गमछां त्वपुयाः सहज व सरल आपूर्ति यानाः जनता जनार्दनया बपि क्वँय् धुसिलुइक सेवा याःगु खँयात निम्ह प्यम्हेसिन थ्व महान ज्या खः धकाः छुं छुं अखबारय् मुसु थुसुथुसु तःसां टेलिभिजनय्  नांगागु ख्वाःपाः ब्वःया ल्ह्वइगु खँ अपोजिसनतय्सं थ्व महान सत्य खः धकाः बय्बय् यानाब्यूसां भ्वखाचं दुनामवःगु देगःया फय्गं इतिइती न्हिलाः मरुसतः धमस्वाःगु स्वयाच्वनी । 
 
 
भिंद्यः थें बल्लापिन्सं यानाच्वंगु  सतक बिस्तारया विरोध कार्यक्रम, भ्यूटावरया जग म्हूगु स्वस्वं, रानीपुखूया हविगतया विगुल पुइतः तिंख्यलय् जागिर नःवनी । हाःपिं हालाच्वनी ख्वःपिं ख्वयाच्वनी । ल्यूने ल्यूने छेँदुपिं थःथवं गफ न्याय्का च्वनी । दुनें दुनें न्ह्यःने लाःगु छेँ याकनं पिइमाल धकाल् भाइकाइ चिथाय् गफ याःवनी । 
 
 
गफ फ्लाइओभरया जूसां फोहर ब्यवस्थापन चुस्त दुरुस्त जूगु कारणं भुजिंत ब्वया हे च्वंगु दु अर्थात् फ्लाइ धइगु भुजिं ओभर धइगु झीगु च्वं च्वं ब्वयाच्वंगु दु धाःगु खः । गफ स्मार्ट सिटीया जूसां धः व गाः ल्हाकेगु ज्या लां लां मजुइगु हे कर्मचारीतय्गु स्मार्ट्नेस खः । 
 
 
मेगु मेट्रो, स्काइ बुलेट ट्रेन«त प्वाथय् हे मदुगुनिगु ज्या संभाब्यताया गफ यायां हे छगू निगू कार्यकाल ला अथें बी तिनि । बरु, डोजर ट्रेन धाःसा थाय् थासय् न्ह्याकूगुयात कयाः न्ह्यलुवाया पगरी घानाच्वंपिं तलुवा फ्यइपिं जूगु कारणं सरकारी फय्गंतय्सं याना वयाच्वंगु “फन्टुस गफ” चाहिँ धात्थेंयागु हे खँ थें जुयाब्यूगु दु ।
 
 
थौंकन्हय् निगूप्यंगू  मिडिया, निम्ह प्यम्ह नेतातय्सं याइगु छुं छुं फन्टुस गफया धलः थथे दु ।
 
 
लँ क्वत्यला दय्कातःगु छेँ 
लँय् दथुइ दय्कातःगु देगः
मरुसतः स्वयांं धरग्वाराया बय्बय्  
बिकास याय्त लँ तब्याः याय् हे माः 
 
 
बिना मुआब्जा छेँ थुनाः जक विकास जुइ ।
सुकुम्वासी यक्व दत कि देश बिकास जुइ । 
गुलि अप्वः मोटरकार, उलि बिकास 
गुलि अप्वः रिङ्ग रोड, उलि हे निकास 
आदि आदि । 
 
 
देश फन्टुसतय्गु ल्हातिइ उकिं योजना नं फन्टुस ।  बिकास नं फन्टुस । सकतां सकतां फन्टुस खयाः नं थ्व ‘मिनि ध्याचू’ चाहिँ फन्टुस मखु न्हां । थ्व चाहिं सत्यगु गफ ।