मिसाःतय्गु सहभागिता मेगु देशय् मदुगु उदाहरण
नृपेन्द्रलाल श्रेष्ठ | गुंलाथ्व चतुर्थी ११३७ (अगष्ट ६ २०१७)
![](https://www.lahananews.com/sites/default/files/kp%20oli.jpg)
दक्षिण एसियाली महिला संगठनतय्गु सञ्जालं थौं छगु ज्याझ्वः दथुइ नेकपा एमालेया अध्यक्ष केपी शर्मा ओलीं थपिन्सं भोट सालिगु नितिं मखुसें सामाजिक ह्युपाः हयेगु नापं न्याय्या नितिं राजनीतिक ख्यलय् मिसाः सहभागिता अप्वस्या अप्वय् किगु लागि खः धकाः धयादिगु खः ।
थौं जुगु उगु ज्याझ्वःयात सम्बोधन यासें ओलीं केन्द्रीय व प्रादेशिक सरकारय् ३३ नाप स्थानीय सरकारय् ४० प्रतिशत मिसाःतय्गु सहभागिता मेगु देशय् मदुगु उदाहरण तकं न्ह्यथनादिगु दु ।
ओलीं स्थानीय तहया निर्वाचनय् त्यापिं मिसाः प्रतिनिधि मध्ये एमालेया जक ४७ प्रतिशत मिसाः दुगु धका नं दाबी याना दीगु खः । समाजय् ल्यूने लाना च्वंगु वर्गयात समान हैसियतय् हयेगु थःगु पार्टीया मु आज्जुु जुगु वय्कलं धयदिगु दु । २१औं शताब्दीयात समान सहभागिताया अभियानया रुपं येंकेगु नारा ज्वनां दक्षिण एसियाली महिला सम्मेलन येँय् न्हयाःगु खः ।
सम्मेलनय् मिसाः हिंसा, गरिवी निवारण, राजनीतिक सहभागिता लगायतया विषयलय् सहलह जुइगु जुगु दु । दँय्दसँ दक्षिण एसियाया ब्याग्लं ब्याग्लं देशय् जुईगु सम्मेलनय् सामाजिक सुरक्षा, गरिवी निवारण लगायतया विषयलय् घोषणापत्र जारी याईगु जुगु दु ।