मिसा टी—ट्वान्टी विश्वकप छनोटय् कुवेतविरुद्ध म्हितीगु
कछलागा षष्ठी ११४२, मंसीर ९ बिहीवाः
आईसीसी मिसा टी–ट्वान्टी विश्वकप एसिया छनोटया स्वंगूगु कासाय् नेपामि मिसातय्गु क्रिकेट पुचलं थौं कुवेतविरुद्ध धेंधेंबल्ला यायेत्यंगु दु ।
कासा दुबईया आईसीसी एकेडेमी ग्राउन्डय् सुथय् जःछिपुलाः ११ताः ईलय् न्ह्याइगु जूगु दु । ग्लोबल छनोटया सम्भावना कायम यानातयेत नेपालं कुवेतविरुद्ध कासा त्याकेमाः ।
सन् २०१९ लय् जूगु कासाय् नेपालं कुवेतयात ३०गू रनं बुकूगु खः । धेंधेंबल्ला अन्तर्गत न्हापांगु कासाय् नेपाः हङकङनाप ६गू विकेटं बूगु खः । तर, नेपालं निगूगु कासाय् भुटानयात ८गू विकेटं बुकाः विश्वकपया ग्लोबल छनोटया नितिं सम्भावना म्वाकूगु दु ।
उखय् कुवेतं धाःसा थःगु निगुलिं कासा बूगु दु । कुवेत, भुटानलिसे ४०गू रन अले मलेसियानाप ८१गू रनं बूगु खः । छनोटअन्तर्गत युएई मदिक्क निगू कासा त्याकाः प्यंगू ल्यानाप धलःया शीर्ष थासय् थ्यंगु दु ।
छगू–छगू कासा त्याकूगु नेपाः, मलेसिया, हङकङ व भुटानं ज्वःलाक्क निगू–निगू ल्या दयेकूसां नेट रनरेटया लिधंसाय् नेपाः निगूगु, मलेसिया स्वंगूगु, हङकङ प्यंगूगु अले भुटान न्यागूगु थासय् दु ।
धेंधेंबल्लाया प्यंगूगु कासा नेपालं वइगु शुक्रवाः अर्थात कन्हय् मलेसियाविरुद्ध अले न्यागूगु कासा आइतवाः युएईविरुद्ध म्हिती । त्याकामि पुचः विश्वकपया ग्लोबल छनोटय् थ्यनी ।
