२०८० चैत्र १५, बिहिबार

मिसा दबूया स्वक्वःगु दँ मुँज्या

अमिर मैया रञ्जित | कछलाथ्व सप्तमी ११४० (नोभेम्वर ३ २०१९)

नेवाः मिसातयेगु राष्ट्रिय संगठन नेवाः मिसा दबूया स्वक्वःगु बुदिं क्वचाःगु दु ।
 
 
उगु ज्याझ्वलय् मूपाँहा कथं प्रदेस नं. ३ या सांसद शोभा शाक्यं उलेज्या यानादीसे निम्ह नेवाः मिसापिं नाप छम्हेसित ’रत्नदेवी प्रजापति सिरपाः’ लःल्हागु खः । 
 
 
खुगू दसक निसें भाषिक आन्दोलनय् मदिक्क न्ह्याना नेपालभाषा साहित्य सृजना नापं राजनितिक ख्यलय् नं सक्रिय रूपं न्ह्यज्याना च्वंम्ह मय्जु सुवर्ण केसरी चित्रकार, सुक्ष्मबिज्ञानय् पि.एच.डी यानादीम्ह न्हापाम्ह मिसा नापं संबैधानिक आयोगया नायः जुयादीम्ह डा. कयोदेवी यमियात दबूपाखें हंगु खः ।
 
 
अथेहे झिदँ न्ह्यःनिसें मदिक्क नेवाः मिसा अधिकार ख्यलय् ज्या यानादीम्ह छम्ह नेवाः मिसायात रत्नदेवी श्यामदास प्रजापति ट्रष्ट पाखेँ झिद्व तका दांया ‘रत्नदेवी प्रजापति सिरपाः’ इन्दिरा श्रेष्ठयात लःल्हागु खः । 
 
 
दबूया नायः रश्मिला प्रजापतिया सभाध्यक्षताय् जुगु उगु ज्याझ्वलय् नेवाः देय् दबूया मूछ्याञ्जे माइलाबाबु द्यला, न्हुदँ समारोह समिति ११४० या नायः रमेश महर्जन, नेपालभाषा मंका खलः यलया नायः ऋषि प्रसाद श्रेष्ठपिन्सं भिन्तुना न्वचु तयादिगु खःसा दबूया न्वकू कस्तुरी श्रेष्ठं लसकुस व दांभरी अर्चना तण्डुकारं सुभाय् देछा यानादीगु खः ।
 
 
किपा–राजेन्द्र रञ्जित
 
Categorized in राष्ट्रिय