मिसा भलिबल : न्हापांगु खुसी नेपालं रजत त्याकल
शोभा श्रेष्ठ | थिंलाथ्व सप्तमी ११४०
मिसा भलिबलय् उपाधी दावेदार नेपालं वहःया पदकय् लुधंकेमाल । थौं भारतविरुद्धया फाइनल कासा बुइधुंकाः नेपालं निगूगु थासय् लानाः वहःया पदकय् लिकुंगु खः ।
मंगलबाः त्रिपुरेश्वरस्थित राखेपया कभर्डहलय् क्वचाःगु फाइनल कासाय् निगू सेट त्याकाः नं कासा थःगु पक्षय् लाकेत धाःसा मफुत ।
न्हापांगु सेटय् नेपाल बूगु खः । न्हापांगु सेट नेपालं १७–२५या स्कोरं ल्यूने लात ।
वयां लिपाया निगू सेटय् धाःसा नेपाल हे त्यात । निगूगु सेट २५–२३ या स्कोरं नेपाल त्यातसा स्वंगूगु सेट नं २५–२१ ल्याखं त्याकल ।
प्यंगूगु सेटय् २०–२५ ल्याखं नेपाल ल्यूने लात । न्यागूगु सेट थ्यंबलय् ला नेपाल ६–१५या तब्यागु अन्तरं हे बुत ।
सागया इतिहासय् मिसा भलिबलय् नेपालं न्हापांगु खुसी रजतपदक त्याकूगु खः । मेगु खुसी थःपिन्सं लुँया पदक हे त्याकाहयेगु दावी कप्तान अरुणा शाहीं यानाद्यूगु दु ।
थ्वयां न्ह्यः, नेपालं स्वक्वःतक्क कास्यपदक धाःसा त्याकेधुंकल ।
Categorized in कासा
