छेँय् न हे मिसा हिंसा क्वचायेकेनु धइगु नारानाप थौंनिसें लैंगिक हिंसाविरुद्वया १६न्हुयंकंया अभियान न्ह्याःगु दु ।

७५गू प्रतिशत मिसा हिंसा छेँजः व लिक्कया मनूतय्सं यानाच्वंगु छगू अध्ययनं क्यंगु दु । अथेजुयाः छेँय् न हे मिसा हिंसा क्वचायेकेनु धइगु मू नारा थ्वयेकूगु राष्ट्रिय महिला आयोगया अध्यक्ष कमला पराजुलीं धयादिल ।

मिसातय्सं हिंसाविरुद्ध उजुरी मबियाः न्याय चूलाकेगुलिइ प्रभावकारी ढंगं ज्या मजुयाःच्वंगु खनेदु । गुलिसिन छेँजःदुनेया स्वापु स्यनीगु ग्याचिकूया हुनिं उजुरी मबीगु यानाच्वंगु धागु दु ।

अथेजुयाः २०७५ सालंनिसें मंसीरया ९ निसें २४ गतेतकया ईयात लैंगिक हिंसाविरुद्घया अभियान कथं हनेगु निर्णय यनाताःगु दु । थ्व ईलय् देय्या ७सः व ५३गुलिं स्थानीय तहलय् मिसा हिंसाविरुद्ध जनचेतना अभिवृद्धि यायेगु कथंया ज्याझ्वः यायेगु तयारी दु ।

थ्वहेदथुइ थीथी गैरसरकारी संस्थातय्सं जनचेतनामूलक ज्याझ्वःत याइगु जूगु दु । अथेहे, अभियान ताःलायेमा धइगु हसना बीत राष्ट्रपति विद्यादेवी भण्डारी व प्रधानमन्त्री शेरबहादुर देउवां भिंतुनादीगु दु ।

Categorized in राष्ट्रिय