मिसा हिंसा न्यूनीकरण अभिमुखीकरण ज्याझ्वः
लहनान्युज | यंलागा द्धादशी ११३९ (सेप्तेवर २६ २०१९)
ताम्रकार कुलदेवता उग्रचण्डी माई संरक्षण समिति (ताम्रकार समाज)या ग्वसालय् मिसा हिंसा न्यूनीकरण अभिमुखीकरण ज्याझ्वः जुगु दु ।
उगु ज्याझ्वलय् यलय् न्हुपि महानगरीय प्रहरी प्रभाग मंगलबजाःया चञ्चला श्रेष्ठ, यलया प्रमुख जिल्ला अधिकारी भगिरथ पाण्डे व महानगरीय प्रहरी परिसरय् प्रहरी प्रमुख वरिष्ठ प्रहरी उपरीक्षक टेकप्रसाद राईयात लसकुस ज्याझ्वः न जुगु खः ।
उगु अभिमुखीकरण ज्याझ्वलय् प्रभागया प्रमुख नाप प्रहरी निरीक्षक चञ्चला श्रेष्ठं सहरय् नं मिसातय्त कयाः फरक कथंया हिंसा जुइगु यानाच्वंगु धासें गां गामय् अज्याःगु घटना झन् ग्यानापुसे च्वंगु धयादिल । वय्कलं धयादिल, ‘मिसातय्गु सहन शक्ति हे इमिगु कमजोरी खः, उकिं थज्याःगु ज्याझ्वलं थनया जनताया भावना, समस्या थुइकेत तःधंगु ग्वाहालि जुइ धका धयादिगु खः ।’
अथेहे ज्याझ्वलय् प्रमुख जिल्ला अधिकारी नियुक्त जुयाःदीम्ह भगिरथ पाण्डे यल छगू सांस्कृति, पुरातात्विक नगरी जूगु व स्थानीय जनतया भावना व मनोविज्ञानयात थुइकाः प्रशासनं ज्या याना वनेगु जुइ धयादिसें ‘मिसा हिंसा न्यूनीकरणया निंतिं स्थानीय व प्रहरी प्रशासनया कुतलं जक सम्भव मजुइगुलिं स्थानीय समुदायया नं ग्वाहालिया नितान्त आवश्यक दु धयादिगु खः ।’
समाजया अध्यक्ष रविन्द्रराज ताम्रकारं आःया प्रशासन उत्तरादायी समुदायमैत्री जुइ फयेकेमाः धका धयादिसे प्रशासन, प्रहरी परिसर व प्रहरी प्रभागय् न्हूगु नेतृत्व वइबलय् लसकुस यायेगु व परिचयात्मक ज्याझ्वः यायेगु न्हूगु खँ मखये धुंकल धयादिसे समाजं फरक अभ्यासया रुपय् लसकुस यायेगुया नापनापं शान्ति, सुरक्षाया विषयय् अन्तक्र्रिया, सहलह ज्याझ्वः याना वयाच्वंगु जानकारी न बियादिगु खः ।
अथेतु, महानगरीय प्रहरी परिसरय् प्रहरी प्रमुख वरिष्ठ प्रहरी उपरीक्षक टेकप्रसाद राई न समुदाय प्रहरी साझेदारीया मर्मयात हरेक नागरिकया मन मस्तिष्कय् स्थापित यायेत छुं नं कसर ल्यंकेगु जुइमखु धासें नेवाः समुदायया भाषा, कला, संस्कृतिप्रति थःगु तःधंगु सम्मान दु धका धयादिगु खः ।
ज्याझ्वलय् समाजया उपाध्यक्ष विनोद ताम्रकार, महासचिव शम्भू गोविन्द ताम्राकारं नं नुगःखँ तयादिगु खः ।
