मुखर्जीया भ्रमणया धलः सार्वजनिक
लहनान्यूज सम्वाददाता | कौलागा चतुर्दशि ११३६ (अक्टोबर २९ २०१६)
थ्व हे कार्तिक १७ गतेनिसें जुइत्यंगु भारतीय राष्ट्रपति प्रणव मुखर्जीया नेपाल भ्रमणया धलः थौं परराष्ट्र मन्त्रालयं सार्वजनिक याःगु दु ।
थौं परराष्ट्र मन्त्रालयं भ्रमणया धलःलिसें पिथंगु विज्ञप्ती कथं कार्तिक १७ गते नेपाःया राष्ट्रपति विद्या भण्डारीं त्रिभुवन अन्तर्राष्ट्रिय विमानस्थलय् मुखर्जीयात लसकुस यानादी । विमानस्थलं मुखर्जी तप्यंक हे राष्ट्रपति भवन शितल निवास झायाः निगुलिं देयया राष्ट्रप्रमूखपिं नापलाइसा शितल निवासय् हे ज्यःनाःया ग्वसाः ग्वइ ।
व धुंकाः मुखर्जीं उपराष्ट्रपति नन्दकिशोर पुन व प्रधानमन्त्री पुष्पकमल दाहालयात ब्यागलं ब्यागलं नापलानादी । उकुन्हु हे बहनी प्रधानमन्त्री दाहालं मुखर्जीया सम्मानय् बेलिया ग्वसाः ग्वयादी ।
कार्तिक १८ गते पशुपतिया दर्शन लिसें पूजा यायेधुंकाः भारतीय राष्ट्रपति मुखर्जी काठमाडौं विश्वविद्यालयं बीगु मानार्थ विद्यावारिधिया उपाधि लःल्हाना कयादी । मुखर्जी व हे दिनय् नीति अनुसन्धान प्रतिष्ठान व भारत फाउन्डेसनं ग्वसाः ग्वइगु गोष्ठियात सम्बोधन यायेधुंकाः थीथी दलया नेतातयत नापलानादीगु ज्याझ्वः दु ।
कार्तिक १९ गते जनकपुरया रामजानकी मन्दिरय् पूजा व दर्शनया ज्याझ्वः धुंकाः मुखर्जी थःगु सम्मानय् ग्वसाः ग्वइगु ज्याझ्वलय् ब्वति कायेधुंकाः पोखरा झाइगु ज्याझ्वः दु । पोखरां लिहां वयाःलि १९ गते बहनी वयकः भारत लिहांझाइ ।
Categorized in राजनीति
