२०७८ मङ्सिर २१, मंगलबार

मुख्यमन्त्रीपिं राई व शाही पद लिसें गोपनीयताया सपथ काल

कौलागा द्धादशी ११४१, कार्तिक १६ मंगलवाः

प्रदेश १ या न्हूम्ह नियुक्त मुख्यमन्त्री राजेन्द्र राईं पद लिसें गोपनियताया शपथ कयादीगु दु ।

वयेकयात प्रदेश प्रमुख सोमनाथ अधिकारी प्यासीं शपथ कायेकादीगु खः । मुख्यमन्त्री राईया सिफारिसय् म्हिगः हे ४म्ह मन्त्री व छम्ह राज्यमन्त्री नं नियुक्त जूगु दु । नेपाली कांग्रेसपाखें केदार कार्की आन्तरिक मामिला तथा कानुनमन्त्री व हिमाल कार्की भौतिक पूर्वाधार मन्त्री, नेकपा माओवादी केन्द्रबाट इन्द्रबहादुर आङ्बो आर्थिक मामिला तथा योजनामन्त्री व जनता समाजवादी पार्टीया जयराम यादवं  सामाजिक विकास मन्त्रीया शपथ कयादीगु दु ।

अथेहे संघीय लोकतान्त्रिक राष्ट्रिय मञ्चया कृष्णकुमारी तुम्बाहाङ्फें सामाजिक विकास राज्यमन्त्रीया शपथ कयादीगु दु । थ्वहे दथुइ मुख्यमन्त्री राईं भलसाया मत कया जक मन्त्रिपरिषद विस्तार यायेगु धयादीगु दु । शपथ कायेधुंका पत्रकारतयेलिसे खँ ल्हासें वयेकलं न्हापा भलसाया मत कया जक मन्त्रालयया ल्याः थप यायेधुंका मन्त्रिपरिषद विस्तार यायेगु जानकारी बियादील ।

प्रदेश सरकारं मेगु बजेट हइगु वा महइगु खँय् सत्तारुढ गठबन्धन व मन्त्रिपरिषदय् सहलह जुइगु वयेकया धापू दु । मुख्यमन्त्री राईं योजना छनोटय् भूमिका मदूगुलिं सांसदत निरीह थें खनेदूगु धका उकियात सम्बोधन यायेगु धयादील ।

कर्णाली प्रदेश सरकारया न्हूम्ह मुख्यमन्त्री जीवनबहादुर शाहीं पद लिसें गोपनीयताया सपथ कयादीगु दु । वंगु चान्हय् प्रदेश प्रमुख गोविन्दप्रसाद कलौनीं शाहीयात पद लिसें गोपनीयताया सपथ कयादीगु खः । नेपाली कांग्रेस, नेकपा (माओवादी केन्द्र) व  नेकपा (एकीकृत समाजवादी) लिसेंया गठबन्धनया समर्थनय् शाही मुख्यमन्त्री जुयादीगु खः ।

नेपाली कांग्रसया शाहीं १६ला प्रदेश सरकारया नेतृत्व यानादी । गठबन्धन दुने मन्त्रालय बाँडफाँडया खँ लिच्वःलय् थ्यनेधुंका मन्त्रिपरिषद् विस्तार जुइगु न्ह्यथंगु दु । गठबन्धनय् पालंपाः सरकार न्ह्याकेगु सम्झौता जू कथं म्हो ईया नितिं वयेक मुख्यमन्त्री जुयादीगु खः । थ्वयान्ह्यः मुख्यमन्त्री महेन्द्रबहादुर शाहीं सोमबाः पदं राजीनामा बिइधुंका वयेकयात मुख्यमन्त्री जुइत लँपू चाःगु खः  । 

वंगुृ वैशाख ३ य् भलसाया मत कयाच्वंबलय् जूगु सहमति कथं महेन्द्रबहादुर शाहीं वयेकयात याउँक सत्ता लःल्हानादीगु खः ।

Categorized in राजनीति