मुख्यमन्त्री पृथ्वीसुब्बा गुरुङ पदमुक्त जुयादिल
कछलागा औंसी ११४१,जेष्ठ २७ बिहीवाः
गण्डकी प्रदेशया मुख्यमन्त्री पृथ्वीसुब्बा गुरुङ पदमुक्त जुयादिगु दु । विहीबाः प्रदेशसभा मुँज्याय् जूगु मतदानय् विश्वासया मत कायेमफुसेंलि मुख्यमन्त्री गुरुङ स्वतः पदमुक्त जुयादीगु दु ।
५८ सांसद उपस्थित जूगु प्रदेशसभाय् २७म्हे सिन मुख्यमन्त्रीया पक्षय् मतदान याःगु खः धाःसा ३०म्ह सांसदपिन्सं विपक्ष मतदान याःगु खः । राष्ट्रिय जनमोर्चाया सांसद कृष्ण थापां मतदान यानामदी ।
गुरुङया पक्षय् नेकपा एमालेया सांसदं मतदान याःगु खः धाःसा विपक्षय् नेपाली कांग्रेस, माओवादी केन्द्र, जनता समाजवादी पार्टी व राष्ट्रिय जनमोर्चाया सांसदपिन्सं मतदान याःगु खः ।
वंगु वैशाख २७ गते गण्डकी प्रदेश प्रमुख सीतादेवी पौडेलं संविधानया धारा १६८ या उपधारा ३ कथं मुख्यमन्त्री गुरुङयात मुख्यमन्त्री पदय् नियुक्त यानादिगु खः । उपधारा ४ कथं मुख्यमन्त्री गुरुङ लच्छि दुने प्रदेशसभापाखें विश्वासया मत कायेमाःगु खः ।
मुख्यमन्त्रीं विश्वासया मत कायेमफुसेंलि आः संविधानया धारा १६८ या उपधारा ५ कथं सरकारया नितिं लँपू चाःगु दु ।
