मूमू दल गम्भीर मजूगु यादवया द्वपं
लहनान्यूज सम्वाददाता | कछलाथ्व पञ्चमि ११३७ (५ नोभेम्बर २०१६)
संघीय समाजवादी फोरम नेपालया नायः उपेन्द्र यादवं संविधान संशोधन यायेत न्हयक्वःतक ई क्वःछ्यूसां नं मू मू दल गम्भीर मजूगु द्वपं बियादीगु दु ।
थौं विराटनगर विमानस्थलय् संचारकःमितलिसे खँल्हानादिसें मधेसी मोर्चाया नेतातकं खःम्ह यादवं उगु खँ धयादीगु खः । वयकलं तत्काल समस्याया निकासा ममाःसा मधेसी जनता सुम्क च्वनामच्वनीगु धयादिल ।
संविधान संशोधनया कुतः हे मयासें स्थानीय निकाय पुनःसंरचना व स्थानीय निकायया निर्वाचनया छुं नं अर्थ मदुगु नेता यादव धयादिल ।
थ्वहे झ्वलय् मधेसी जनअधिकार फोरम लोकतान्त्रिकया नायः विजयकुमार गच्छदारं मधेसी मोर्चां ल्ह्वंगु मागया विषयस ठोस प्रस्ताव वये मफूगुलिं सहमतिया वातावरण दयेके मफयाच्वंगु धयादिल । नायः गच्छदारं सीमांकनलिसें मोर्चां ल्ह्वंगु मागया विषययात कयाः सहलह जूसां ठोस प्रस्ताव मवःगुलिं सहमतिया वातावरण दयेकेमफयाच्वंगु धयादिल ।
नेपाली कांग्रेस, नेकपा एमाले व माओवादी दथुइ सहमतिया वातावरण दयेकाः न्ह्याःवनेगु खःसा संविधान संशोधन व मेमेगु विषयं याकनं हे पूर्णता प्राप्त याइगु खँ थौं विराटनगर विमास्थलय् सञ्चारकःमितलिसे खँल्हानादिसें धयादिल ।
Categorized in राजनीति
