मेक्सीकोय् वःगु ग्रेस वाफय्या हुनिं जनजीवन प्रभावित
गुंलाथ्व पञ्चमी ११४१, भाद्र ६ आइतबाः
मेक्सिकोय् वःगु ग्रेस वाफय्या हुनिं म्ह्वतिं ८ सीगु दु ।
सीपिंमध्ये छगू हे परिवारया खुम्ह दुगु अनया राज्य सरकारया अधिकारीतय्सं धाःगु दु । वाफय्लिसें वा वयेधुंकाः वःगु खुसिबाःया हुनिं विद्युत आपूर्तिइ समस्या जूगु दु ।
वाफय्या हुनिं मेक्सीकोया भेराक्रुज राज्य अप्वः प्रभावित जूगु दु । वाफय्या हुनिं सिमा क्वदःगु दुसा सडक लखं जायाः पुखू जुयाच्वंगु दु ।
मेक्सीकोया पूर्वी क्षेत्रय् ग्रेस वाफय्या लिच्वः अप्वः लाःगु अन्तराष्ट्रिय सञ्चारमाध्यमं न्ह्यथंगु दु । तच्वःगु गतिया फय् अले तसकं वा वःगु हुनिं उगु क्षेत्रया जनजीवन प्रभावित जूगु दु ।
Categorized in अन्तर्राष्ट्रिय
