२०८० चैत्र १६, शुक्रबार

मेट्रो एफ.एम.या नीक्वःगु बुदिं हन

लहनान्युज | यंलागा नवमी ११३९ (सेप्तेवर २३ २०१९)

येँ महानगरपालिकापाखें न्ह्याका वयाच्वंगु दक्षिण एसियाया हे स्थानीय तगिंपाखें सामुदायिक एफ.एम. रेडियोया रुपय् पलिस्था जूगु न्हापांगु एफ.एमं “मेट्रो एफ.एम.९४.६ मेगाहर्ज”या २० क्वःगु बुदिं असोज १ गते बुधवाः राष्ट्रिय सभागृहय् हन ।
 
 
मेट्रो एफ.एम.या नीक्वःगु बुदिंया लसताय् नेपाःया हे मौलिक लिपि रञ्जना लिपिया प्रचारप्रसारलिसें जनस्तरय् छ्यलाबुला याय्गु तातुनां जूगु ‘रञ्जना लिपि च्वज्या धेंधेंबल्ला कासा’ त्याकादीपिन्त मूपाहाँलिसें येँ महानगरपालिकाया मेयर विद्यासुन्दर शाक्य, महानगरपालिकाया प्रवक्तालिसें १५ वडाया वडाध्यक्ष ईश्वरमान डंगोलपिन्सं नगद सिरपाःलिसें दसिपौ लःल्हानादीगु खः।
 
 
स्वनिगःया येँ, यल, ख्वपलिसें बुंगः, खोना, थसि, थिमि, रामकोट, तोखा, फुसिंख्यः, थेच्व, नैकाप, सक्वपाखें मुक्कं ८७म्हेस्यां ब्वति काःगु उगु धेंधेंबल्लाय् चाबहीया सजिन डंगोल न्हाप, खोनाया राजन डंगोल ल्यू व थिमिया वीरकाजी (विक्की) बज्राचार्य लियांल्यू लाःगु खःसा वय्कःपिन्त छसिकथं नीन्याद्वः, झिंन्याद्वः व झिद्वःतका दां सिरपाः लःल्हाःगु खः । अथे हे, हःपाः सिरपाःकथं झिम्हेसित द्वःछि÷द्वःछितका दां लःल्हाःगु खः ।
 
 
थुकथं हे च्वज्या कासाया प्रशिक्षकया लिसें सांस्कृतिक ब्वज्या यानादीपिं कलाकार व संस्थायात नं हनापौ लःल्हाःगु खः।
 
 
येँ महानगरपालिकाया सूचना सञ्चार समितिया कजि ईश्वरमान डंगोलया सभाध्यक्षताय् जूगु उगु ज्याझ्वलय् महानगरपालिकायाया मेयर विद्यासुन्दर शाक्य, येँमहानगरपालिकाया प्रशासकीय प्रमुख केदार पौडेल, सूचना प्रविधि विभागया प्रमुख राज्यप्रकाश प्रधानांगपिन्सं थःथःगु नुगः खँ प्वंकादीगु खः ।
 
Categorized in राष्ट्रिय