फिलिपिन्सय् लागू वासःया तस्करीलिसे स्वापूदुम्ह छम्ह मेयरयात प्रहरीं जेलय् हे गोलिं कयेकूगु दु ।

प्रहरीया कथं अलबेयुराया मेयर रोनाल्डो एस्पीनोसां प्रहरी अधिकारीयात हे गोलिं कयेकूगु खः । समाचारय् न्ह्यथनातःकथं लिपांगु निगू वालय् सीम्ह वयकः निम्हम्ह मेयर खः ।

राष्ट्रपति रोड्रिगो डुटार्टें निम्हेसिगु नां लागू वासःया ब्यापारलिसे स्वानाच्वंगु खँ धाःगु दु । फिलिपिन्सया राष्ट्रपति डुटार्टेया लागू वासःया ब्यापारलिसे स्वानाच्वंपिं मनूतयत मदयका छ्वयेगु चाहाना खः ।

वयकलं लागू वासःया ब्यापारलिसे स्वानाच्वंपिं ब्यापारी व वलिसे स्वापू तयाच्वंपिं मेयर विरुद्ध कारवाही न्ह्याकेगु खँ छुं वाः न्ह्यःनिसें धयाच्वंगु खः । राष्ट्रपतिया चुनाव जुइधुंकाः न्ह्याकूगु लागू वासः विरुद्धया ज्याझ्वःयात देयन्यंकया समर्थन प्राप्त जुयाच्वंगु दु ।

तर थुकियात कयाः मानवाधिकार हनन जूगु धासें अन्तर्राष्ट्रिय स्तरय् आलोचना जुयाच्वंगु दु । मेयर सीगु खँय् छानवीन यासें जेलया कोठाय् गुकथं ल्वाभः थ्यन धइगु खँ सीकेमाःगु माग जुयाच्वंगु बिबिसीं न्ह्यथंगु दु ।

Categorized in अन्तर्राष्ट्रिय