मेस्सी बार्सिलोनाय् हे च्वनिगु
दिल्लाथ्व पंचमी ११४१,असार ३१ बिहीवाः
अर्जेन्टाइनी फुटबल कासामि लियोनल मेस्सी स्पेनिस क्लब बार्सिलोनाय् हे च्वनिगु जूगु दु ।
बार्सिलोनालिसेया करार ई वंगु जुन ३० तारिखनिसें क्वचागुलिसें विश्व फुटबलया महान कासामि मेस्सी छुं नं क्लबय् आबद्ध जुइत स्वतन्त्र जूगु खः । तर वयेकलं बार्सिलोनाय् हे थप ५ दँ च्वनेगु सम्झौताय् सहमति न्ह्यथंगु धाःगु दु ।
न्हूगु सम्झौता कथं मेस्सी आः सन् २०२६ तक्क अर्थात ३९ दँया वैंश तक्क बार्साय् हे च्वनिगु जूगु दु । थुकिया नितिं वयेकलं थःगु बाब्व तलबय् क्वपालिगु जूगु दु । आः वार्षिक १७गू कोति अमेरिकी डलर तलब कयाच्वंम्ह मेस्सीं आः धाःसा ८गू त्या कोतिया हाराहारीइ पारिश्रमिक लःल्हानाकाइगु जूगु दु ।
बार्सिलोनालिसेया करार ई क्वचायेधुंका मेस्सी न्हूगु सम्झौता मयासें कोपा अमेरिका म्हितेत अर्जेन्टिना वंगु खः । वयेकया कप्तानीइ अर्जेन्टिनां कोपा अमेरिका त्याकेधुंकुगु दु । वयेक आः छेँजःलिसे विदा हनाच्वंगु दु । ६ क्वःतक्कया बालोन ‘डी’ओर त्याकुमि मेस्सीं बार्सिलोनापाखें फुक्क उपाधि त्याकेधुंकुगु दु ।
३४ दँया मेस्सीं २००४ य् सिनियर टिमय् डेब्यु याःगु खः । बार्सिलोनाया कीर्तिमानी कासामि मेस्सीं ७ सः व ९४गू कासाय् ६ सः व ६८ गू गोल याःगु दु ।
Categorized in कासा
