२०७७ माघ ८, बिहिबार

मोटरसाइकलया साइलेन्सरय् सुसकाहःगु लुँ ज्वनः

लहनान्यूज | ने. सं. ११३८ थिंलाथ्व पुन्ही (डिसेम्वर ३, २०१७) लहनान्यूज

चीनया केरुङ नाकापाखें जुइगु लुँःया तस्करी बिरुद्ध प्रहरीं यानाच्वंगु कारवाही बावजूद तस्करी म्हो जूगु अवस्था खनेमदुनि । लुँः तस्करीतयेसं झन न्हूगु उपाय लुइकेगु ज्या यानाच्वंगुया दसु खः शनिवाः सुसकाहःगु लुँःया तस्करी । 
 
वंगु शनिबाः प्रहरीें मोटरसाइकलया साइलेन्सरय् दुने १७ किलो लुँः लुइकूगु दु । महानगरीय प्रहरी वृत्त बालाजुया डिएसपी विश्वराज खडकासहितया टोलींइ शनिबाः करीव चारबजे नियन्त्रणय् काःगु  मोटरसाइकलया साइलेन्सरय् एक केजी तौलया १७ गू लुँःया बिस्कुट ज्वंगु खः । महानगरीय प्रहरीया धापूकथं  सिन्धुपाल्चोकया छुल्तिम लामा गयावःगु बा ७९ प १५३८ नम्बरया मोटरसाइकलय् थथे लुँ सुसकाहःगु खः । 
 
लुँ दुगु खँः सुराकीपाखें सूचं थ्यंगु आधारय् प्रहरीं बालाजु चोकय् मोटरसाइकलयात नियन्त्रणय् काःगु खः। तर लुँः गन तयाहःगु धःका खंके मफयेवं मोटरसाइकलया लगभग दक्वः पार्टपुर्जा जाँचे यायेगु झ्वःलय् साइलेन्सर पाइप सामान्यसिबें झ्याःतुगुलिं स्यंकाः स्वबलय् जक लुइकेफुगु खः । चालक अभियुक्त लामा व मोटरसाइकल नियन्त्रणय् कयाः अनुसन्धान जुयाच्वंगु प्रहरी वृत्तपाखें जानकारी ब्यूगु दु ।
 
किपा साभार ः रमेश खडका
Categorized in अपराध