मोबाईलइ एप्सपाखे ट्राफिक मतया उलेज्या
नृपेन्द्रलाल श्रेष्ठ | यंलागा द्धादशी ११३९ (सेप्तेवर २६ २०१९)
यल महानगरपालिका–१६ वडां तन्त्र भेन्चर्स प्रा.लिया ग्वाहालिं यलय् महापाल चुकय् निप्वाः अत्याधुनिक इन्टेलिजेन्ट ट्राफिक मत तःगु दु ।
करिब १७ लख तुगु उगु मत थौं बुधवाः निसे छ्यगु दु । अनलाईन, मोबाईल एप नाप रिमोट कन्ट्रोलपाखे उगु मत च्याके ज्यु ।
महानगरीय ट्राफिक प्रहरी परिसर ललितपुरया प्रमुख राजेश सिलवाल, पूर्व ट्राफिक सिताराम हाछेंथु, महानगरीय प्रहरी प्रभाग मंगलबजारया प्रहरी निरीक्षक चन्चला श्रेष्ठपिनिगु उपस्थितिइ वडाअध्यक्ष निर्मलरत्न शाक्यं मोबाईलइ एप्सपाखे उगु ट्राफिक मतया उलेज्या यानादिगु खः । उगु ज्याझ्वलय् वडाअध्यक्ष शाक्यं उगु मतं विश्व सम्पदा सूचीकृत जुगु यलया लाय्कुलिं वयेगु वनेत अःपुइगु विश्वास प्वकादिल । ‘ट्राफिक जामया गुनासो न्ह्याबलय् वइगु धयादिसे थुगु मतया ब्यवस्था यानागु धका धयादिगु खः ।
थुगु मत छवाः परीक्षण लिपा नियमित रुपं न्ह्याइगु जुगु दु । सार्वजनिक – निजी साझेदारीया अवधारणा कथं थुगु मतया रेखदेख व अनुगमन न्यादँ तक प्रा.लि हे याइगु धका न धयादिगु खः ।
उगु मत इन्टेलिजेन्सयुक्त जुगु धका प्रा.लि.या प्रदीप श्रेष्ठं धयादिसे ११ म्ह ईन्जिनियरं दयेकुगु खः धका न जानकारी बियादिगु खः । श्रेष्ठं थुगु सिस्टम कम्प्युटर भिजन प्रविधि नाप रेड लाईट भोईलेसन, नोटिफिकेसन, भेइकल काउन्टिङ्ग व क्लासिफिकेसन, भेइकल डेनसिटीया नाप क्लाउड कम्प्युटिङ्गया विशेषता दुःगु खँया न जानकारी बियादिगु खः ।
उगु ज्याझ्वलय् प्रदेश नं ३ या सांसद् ज्ञानेन्द्र शाक्य, मंगल टोल सुधार समितिया उपाध्यक्ष ज्ञानुराज श्रेष्ठं न थःथःगु न थःथःगु खँ तयादिगु खः ।
