मोहनि लिपा सक्रमण अप्वो जुइगु सम्भावना
लहानान्युज | कौलाथ्व चतुर्दशी ११४०,कार्तिक १४ शुक्रवाः
नेपालय् कोरोना भाइरसया संक्रमण मोहनि लिपा झन तच्वया वनीगु खँ जनस्वास्थ्य विज्ञतय्सं धाःगु दु।
संक्रामक ल्वय् विशेषज्ञ डा. अनुप सुवेदीं नेपालय् चिकुला ई सुरु जुइगु लिसें मोहनि नखःया झ्वलय् मनूत उखे थुखे जुयाः वइगु जूगुलिं संक्रमण तच्वया वइगु व स्थिति भयावह खनेदइगु खँ धयादीगु दु ।
वंगु असोज २४ गते निसें न्हिं द्वःछिं मल्याक मनूतय्के संक्रमण खने दुगु एकादशि कुन्हु मुक्कं ५७० म्हेसित जक संक्रमण खनेदत । थ्व छक्वलं म्हो खनेदुगु पिसिआर परीक्षण म्हो जूगुलिं खः । डा. सुवेदीं थःथःगु ज्याय् लिहां वयेगु सुरु जुइवं संक्रमण नं तच्वया वइगु खँ धयादीगु दु। वय्कःया कथं आः चिकुला सुरु जुया वयेवं न्हि च्याद्वःझिद्वः नं संक्रमितत खनेदयेफु ।
नेपालय् कोरोना संक्रमणया न्हापांगु लहर हे नियन्त्रणय् मवःनिगुलि कारणं नं आः झन हे स्थिति भयावह जुइफुगु धापू वयेकःया दु। वय्कलं थुकिया निंतिं आः राज्य व नागरिक निगुलिं पक्ष उतिकं जिम्मेवार जुयाः सचेत जुइमाःगु सुझाव नं बियादीगु दु ।
Categorized in राष्ट्रिय
