२०७८ कार्तिक १०, बुधबार

मोहनीया ईलय् थीथी थासय् दुर्घटना

कौलाथ्व चतुर्थी ११४१, असोज २५ सोमबाः

स्याङ्जाया वालिङ नगरपालिका मर्दीखोलाय् जीप दुर्घटना जुयाः स्वम्ह सीगु दु ।
 
दुर्घटनाय् १६ घाःपाः जूगु दु । वालिङं लाखुडाँडा वनाच्वंगु ग १ ज ४९१८ नम्बरया जीप आइतबाः सनिलय् दुर्घटना जूगु खः । दुर्घटनाय् लानाः सीपिंलय् गल्याङ नगरपालिका १० या ३२दँया गंगा पल्ली, ७७ दँयाम्ह दल बहादुर पल्ली, प्यदँया करिष्मा थापा लाःगु दु । करिष्मा वासः यायेगु झ्वलय् थौं सुथय् मदुगु खः ।
 
अथेहे, गल्याङ नगरपालिकाया ५५ दँया लिला कुमारी पल्ली व निदँया अर्चल विक तसकं घाःपाः जूगु दु । जीप सडकं करिव ५० मिटर क्वय् कुतुंवंगु खः । जीप चालकयात प्रहरीं नियन्त्रणय् कायेधुंकूगु जिल्ला प्रहरी ज्याकू स्याङ्जां न्ह्यथंगु दु ।
 
अथेहे अछामया पञ्चदेवल बिनायक नगरपालिका कुइकाय् वंगु चान्हय् बोलेरो जिप दुर्घटना जुयाः ४ सीगु दु । सीपिंलय् व हे थासय् च्वंपिं १४दँया जीवन न्यौपाने, १८ दँया सर्प बोहरा, १७ दँया जीवन जैसी व १७ दँया हिमाल नेपाली लाःगु दु ।
 
लँ स्वःवनाः लिहांवयाच्वंगु जीप विनायक बजारपाखे वनेगु झ्वलय् दुर्घटना जूगु जिल्ला प्रहरी ज्याकू अछामं न्ह्यथंगु दु । दुर्घटनाय् १४ घाःपाः जूगु दु ।
 
घाःपाः जूपिंमध्ये १२म्हेसित जिल्ला अस्पताल अछामय् वासः यानाच्वंगु दुसा निम्हेसित नेपालगन्ज यंकूगु दु । कच्ची सडकय् ब्याक यायेगु झ्वलय् अनियन्त्रित जुयाः जीप करिब निसः मिटर क्वय् कुतुंवंगु खः ।
Categorized in अपराध