मोहन त:बाः मसीनि
- रत्नकाजी महर्जन
मंगलवाः सुथसिया ५ः३५ ताः इलय् मोबाइलय् छगू एसएमएस वल ।
छगू दुःखया खँ ब्याकाच्वना ज्यापु महागुथिया हनेबहःम्ह संरक्षक ई. मोहनकृष्ण डंगोल मन्त । थौं सुथय् ५ः३० ताः इलय् अन्तिम संस्कारया निंतिं लुतिइ हइगु दु ।
ताः दत, मोहन तःबाः म्हं मफयाच्वंगु । न्हापा हे उच्च रक्तचाप व चिनील्वचं समस्या दुम्ह वयकःयात लिपांगु इलय् जँलास्येँय् नं समस्या खनेदत । छेँजःपिन्सं पिनेया संक्रमण जुइ धकाः हतपत पिनें वःपिन्त नापलाकेगु मयासें वालय् निक्वः–स्वक्वःतक डाइलसिस यानाः वयकःया उसाँय् भिंकेत कुतः यात । तर कालया न्ह्यःने सुयां छुं लगय् मजू । आखिर ने.सं. ११३६ यंलागा तृतिया (असोज ३) चान्हसिया ११ः५५ ताः इलय् वयकलं थःगु भौतिक शरीर त्याग यानादिल ।
नेपालभाषा ख्यःया छगः धिसिलाःगु थां भौतिक रुपं तापाना वन । नेवाः समाज रुपान्तरणया नितिं नेवाःतयत शिक्षित यायेगु नितिं वयकलं थःगु तन–मन–धनं हे न्ह्याबलें न्ह्यचिलादिल । वयकःया हक्की स्वभावं यानाः वयकःयात गलत ढंगं थुइकीपिं मनूत नं यक्व दु । तर दुवाला वनेगु खःसा वयकःया योगदानयात सुनां नं नकारे यायेफइमखु ।
वयकःयात जिं म्हस्यूगु भासं सिसांनिसें धाःसां ज्यू । वयकः जिमि त्वाःया त्वाःनायः । वयकलं २०२९ सालय् किलाघः त्वाःया नायः पद ग्रहण यानादीगु खः । जि त्वालय् प्रत्यक्ष संलग्न ला मदु । अथे नं वयकलं किलाघः त्वालय् यक्व व्यावहारिक सुधार यानादीगु खँ न्यनागु दु । त्वाः भ्वजय् थ्वँ अयलाः प्रतिबन्ध तयेगु थेंजाःगु साहसिक ज्या यानादीम्ह वयकलं किलाघः त्वाःया त्वाःछेँ ल्ह्वनेगु, नासःद्यः, गणेद्यःया देगः भिंकेगु थेंजाःगु सामाजिक ज्या यानादीगु दु ।
वयकःलिसे जिगु निकटतम सम्बन्ध ज्यापु पौया हुनिं जूगु खः । ज्यापु पौ पिदसांनिसें हे ब्वनेगु याना वयाच्वनागु खः । ज्यापु पौया ४७ ल्याः थ्यंबलय् उकिया सम्पादक अनुप सिंह सुवालजुं जिथाय् सेटिङ याकेत हयादिल । जिं सहर्ष स्वीकार यानाः ज्या याना । ज्यापु पौया ५० ल्याः पिदने धुंकाः अनुप सिंह सुवालजुं ज्यापु पौपाखें राजीनामा बियादिल । उगु इलय् ज्यापु महागुथिपाखें समाज सुृधारया नियम हे दयेकाः उकियात लागू यायेगु नितिं त्वाःत्वालय् सहलह यायेगु ज्या जुयाच्वंगु खः ।
अनुप सिंह सुवालजुं राजीनामा बी धुंकाः पौ थातिं जुल, पिमदन । छक्वः छगू ज्या दयाः जि मोहन त:बाःया छेँ बिज्यासलय् वना । अन वयकःलिसे समाज सुधारया नीति नियम लागू मजूगु व ‘ज्यापु पौ’यात कयाः सहलह जुल । ज्यापुतयत सचेत व संगठित यायेत ज्यापु पौ पिकायेमाः, दिकेमज्यू धइगु जिगु मान्यता वयकःयात न्ह्यब्वया । अले ‘ज्यापु पौ’या नितिं ज्या यायेमाःसा जि नं तयार दु धकाः कना । धात्थें वयकलं ‘ज्यापु पौ’या कार्यभार पन्नारत्न महर्जनजुपाखें जितः हे दिके हयादिल । जि नेपालभाषाया विद्यार्थी व ह्यःमि जुयागु नातां थ्व ज्या जिगु नितिं छगू सुुवर्ण अवसरकथं न्ह्यःने वल ।
उबले जिं ‘ज्यापु पौ’या कम्प्यूटर टाइप, लेख रचना संकलन, विज्ञापन संकलन व वितरणया तकं ज्या यानागु खःसा लिपा व्यवस्थापन समितिं पन्नारत्न महर्जनजुलिसें जितः सम्पादकया भाला बिल । ज्या यायेबलय् थीथी थथ्याःक्वथ्याः वयाच्वनीगु स्वाभाविक खः । ज्यापु पतिइ नं थीथी समस्याया सामना यायां न्ह्यज्याज्यां वना । ज्यापु पौया ११९ ल्याः थ्यंबलय् छगू तसकं अप्रिय घटना जुल, गुकिंयानाः ‘ज्यापु पौ’या सम्पादनपाखें पन्ना ककालिसें जि पिहां वया । उगु इलय् मोहन त:बाः अमेरिकाय् झायाच्वनादीगु खः । वयकः दुगु जूसा अजाःगु अप्रिय घटना मजुइगु खःला धइथें जितः ताः ।
मोहन त:बाःया छुं नं च्वयेमाल, टाइप यायेमाल धायेवं जितः सःतादी । जि वने, कयाः टाइप याये । वयकलं न्हापां च्वयादीगु उपन्यास ‘विधि हे विपरित जूसेंलि...’ जुइमा वा वयकःया अप्रकाशित ‘विकल्प’ जुइमा, वयकलं कम्प्यूटर टाइपया नितिं जितः हे भाला बियादीगु दु । वयकःया जंक्वया इलय् वयकःया नुगःखँ मुंकाः वयकःया व्यक्तित्व पिदनीकथंया जीवनी सफू च्वयेगु भाला तकं वयकलं जितः बियादिल । अले जिं वयकःयात दुग्यंक म्हसीके खन ।
वयकःयात समष्टिगत रुपय् धायेबलय् जिं छम्ह समस्या समाधानया नितिं नेतृत्व याइम्ह व्यक्तित्व धकाः धाये मास्ति वः । वयकः ज्यापु महागुथि, येँ महानगर समितिया नायः जुयादीगु इलय्, न्हूदँ समारोह समितिया नायः जुयादीगु इलय् व इन्द्रजात्रा व्यवस्थापन समिति स्वंगु इलय् परिस्थिति सहज मजू । अजाःगु इलय् नं नेतृत्व यानाः छगू निकास बीत ताःलानादीम्ह राष्ट्रिय व्यक्तित्व खः मोहन त:बाः ।
थौं भौतिकरुपं वयकः झीगु न्ह्यःने मदुसां वयकःया साहित्यिक कृति, वयकलं समाजय् यानादीगु योगदानया हुनिं वयकः गबलें नं सी मखु । वयकः नेवाः समाजय् न्ह्याबलें हे लुमंकेबहःम्ह व्यक्तित्व जुयाः म्वाना हे च्वनी । मोहन त:बाः मसीनि ।
