मौलिक बाजं पच्छिमा प्रतियोगिता
लहनान्युज | ञंलागा त्रयोदशी ११३८ ( अक्टुवर ७ २०१८ )
ख्वपया तेखाच्व त्वालय् च्वंगु पुलांसः शिवरात्री गुथिं थुगुसिया ‘भाजुवीर सिरपाः” त्याकूगु दु । मौलिक नापं न्हनावनाच्वंगु बाजं अर्थात ‘पच्छिमा’ कासाय् न्हाप जूसें उगु सिरपाः त्याकूगु खः । गुथियात सिरपाःकथं न्यय्द्वःतका लःल्हाःगु खः ।
उगु कासाय् थिमिया सिवाः साय्मि खलः व ख्वपया साःकोलना शिवरात्री गुथि ल्यू व लियांल्यू लाःगु खःसा छसिकथं उगु गुथियात स्वीद्वः तका व नीद्वःतका सिरपाः लःल्हाःगु खः । देय्न्यंकया मानन्धर समुदायया मंकाः गुथि केन्द्रीय मानन्धर संघ अन्तर्गत भाजुवीर सिरपाः उपसमितिं थुगु पच्छिमा बाजंया कासा याःगु खः ।
ज्याझ्वलय् पुलांम्ह सांसद नापं सिरपाः दाता लक्ष्मीदास मानन्धरं मौलिक बाजं न्हनावनेत्यंगु अवस्थाय् थ्यंगुलिं थुकियात संरक्षण याय्गु तातुनां वि.सं. २०४३ सालनिसें थः बाज्याया लुमन्तिइ बाजं कासा याय्गु नितिं अक्षयकोष नीस्वनागु जानकारी बियादिल । वय्कःयाकथं स्वीस्वदँ थुखे धाः बाजं, खिं बाजं नापं मेमेगु मौलिक बाजं संरक्षणया नितिं कुतः याना वयाच्वनादीगु दु ।
थुगुसिया कासाय् येँया चसांद्वः मानन्धर सनागू खलः, पाक्व पुखुद्यां मानन्धर सनाः खलः, थँहिति मानन्धर गुथि, सक्वया सक्व मानन्धर गुथि, ख्वपया पुलांसः शिवरात्री गुथि, तापालाछि, साःकोलान शिवरात्री गुथि, भ्वँतया वाङ्ख्यः दाफा भजन खलः, मध्यपुर थिमि मानन्धर संघ, सिवाः साय्मि खलःलिसें झिगू पुचःया ब्वति दुगु खः । उगु कासाया निर्णायककथं मौलिक बाजंया विज्ञपिं न्हुच्छेबहादुर डंगोल, धर्म मुनिकार व सूर्यनारायण महर्जन च्वनादीगु खः ।
