वंगु दँ विद्रोहमार्फत सत्ता ल्हाःतय् काःगु म्यानमारया सैनिक शासक मिन आउङ ह्लिङं थःगु शासनयात वैधानिकता चूलाकेत धर्मया लिधंसा कायेगु कुतः याःगु दु ।

वय्कलं हलिंया दकले तःधिकःम्ह फेतुनाच्वंम्ह बुद्धया मूर्ति दयेकेगु योजना सार्वजनिक यानादीगु दु । थुकियात बुद्ध धर्मया संरक्षकया रूपय् थःगु विरासत दयेकेगु कुतः याःगु खनेदु ।

वंगु ६०दँनिसें सैन्य नियन्त्रणय् दुपिं ९०गू प्रतिशत बौद्धमार्गीतय्त देशय् सत्तायात वैधानिकता बिइकेगु कुतः याःगु खनेदु । वंगु अक्टोबरय् मिनं म्यानमारया निगूगु तःधंगु शहर मण्डलेया यक्व गुम्बाय् थ्यंकाः दर्शन यानाः दान तकं यानादीगु खः । वय्कलं नापलाःपिं भिक्षुत मध्ये राज्य संघ महानायक समितिया नायः भामो सायदव न खः ।

थ्वसिवे न्ह्यः उगु हे महिनाय् सेनां उत्तरपश्चिमी चीन राज्यया थान्टलांगय् छगू अभियान न्ह्याकूगु खः । थ्वहेझ्वलय् सेनां सलंसः भवनत ध्वस्त याःबलय् द्वलंद्व नागरिकत थःथःगु थाय् व बाय् त्वःतवनेत बाध्य जूगु खः ।

उच्चपदस्थ भिक्षुतनाप सैन्य नेतृत्वं नापलाःगु खबरयात राज्यं न्ह्याकातःगु सञ्चार माध्यमय् न्हियान्हिथं प्रशारण यानाच्वंगु दु । उकियात सैनिक शासक मिनं सार्वजनिक सम्बन्ध सुधारया कुतः यानाच्वंगु कथं विश्लेषण याःगु दु ।

छगू अध्ययनं बौद्ध धर्मया सम्बद्र्धनया नितिं सैनिक सरकारं याःगु कुतःया सार्वजनिक प्रदर्शन थ्यंमथ्यं प्यदुगं अप्वःगु खनेदु । म्यानमारया सेना धर्मयात सहानुभूतिया कथं छ्यलेगु मामिलाय् अतिकं चलाख जूगु धयातःगु दु ।

तर छुंया ल्याखय् बौद्ध भिक्षुतय्सं धाःसा शासकं क्यंगु धर्मप्रतिया झुकावयात नक्कली सहानुभूति धकाः धयाच्वंगु दु । इमिसं सैनिक शासकतय्सं आः यानाच्वंगु ज्यापहः धर्मया अःखः जूगु न धागु दु ।

Categorized in अन्तर्राष्ट्रिय