२०८० चैत्र १६, शुक्रबार

म्यूजिक भिडियो अवार्डस् २०१९ ज्याझ्वः क्वचाल

लहनान्युज | सिल्लाथ्व सप्तमी ११४०

ताःई न्ह्यःनिसें नेवाः संकिपाया ख्यलय् सक्रिय जुया वयाच्वंम्ह स्वतन्त्र संसार महर्जनया संसार क्रियसन्सया ग्वसालय् जुयाच्वंगु नेपालभाषा स्टार म्यूजिक भिडियो अवार्डस् २०१९ ज्याझ्वःया समापन समारोह ज्याझ्वः क्वचाल । 
 
समापन समारोह ज्याझ्वलय् नेपाल सरकारया शहरी विकास राज्यमन्त्री रामवीर मानन्धर मूपाहाँकथं झायादीगु खःसा वय्कलं नेपालभाषा स्टार म्यूजिक भिडियो अवार्डस् २०१९ ज्याझ्वलय् संसार सप्तरंगी सम्मानं सम्मानित जूपिन्त हनापौ लःल्हानादीगु खः ।
 
नेपालभाषाया संकिपा व संगीतया ख्यलय् ज्वःमदुगु योगदान बियादीपिं आदिवासी संकिपा ख्यःया न्हापांम्ह हिरो जय श्रेष्ठ, नेपालभाषा संकिपा ख्यःया न्हापांम्ह पत्रकार विजयरत्न असंबरे, राजमति संकिपाया हिरोइन हिसिला महर्जन, नांजाःम्ह संगीतकार मनराजा नकःमि, नांजाःम्ह मेकपमाएन सनमकुमार श्रेष्ठ व नांजाःम्ह गायक जुजुकाजी रंजित व वरिष्ठ निर्देशक व कलाकार पवन जोशीयात मूपाहाँ मानन्धरं हनापौ लःल्हानादीगु खः । 
 
ज्याझ्वलय् लहना वाःपौया ब्यवस्थापक सुरेन्द्रभक्त श्रेष्ठयात ग्वाहालि यानादीगुलिं मतिनाया चिं लःल्हानादीगु खः ।
 
येँया भृकुटी मण्डपय् च्वंगु नेपा पर्यटन बोर्डया हलय् जूगु उगु ज्याझ्वलय् ख्यालि जुजु मदनकृष्ण श्रेष्ठ, यल महानगरपालिका वडा ल्याः २१ खोनाया वडाध्यक्ष रबिन्द्र महर्जन, नेपाल चलचित्र कलाकार संघया नायः रबिन्द्र खड्कापिन्सं नं नुगः खँ तयादीगु खः ।
 
Categorized in मनोरन्जन