म्हिगःया बुटवलया सुकुम्बासीं थौं बालुवाटारया जग्गा न्यात
गगन थापा
सांसद लिसें पुलांम्ह मन्त्री, नेपाली कांग्रेस
थः व मां अबु न्हापां सोलखुम्वुपाखें अवसर मालेगु नितिं येँ वयागु खः । जि थन हे जन्म जूगु जुयाः थनया वातावरणय् ब्वलन । जिगु छेँजःपिनिगु भाषा, संस्कृतिपाखें जितः प्रभाव लाइगु ला स्वभाविक हे जुल, तर थन स्वनिगलय् च्वंपिं नेवाःतय्गु संस्कृतिपाखें नं जि तसकं हे प्रभावित जुल ।
थः मचाबलय् थन बाजं थानाः, बाँसुरी पुयाः वइगु तसकं यः व ब्वाँय् वना स्वः वनेगु खः । थुगु भाषा, साहित्य, कला, संस्कृति सरकारं संरक्षण, सम्बद्र्धन यानाच्वंगु थें ताःगु खः । लिपा जिं थुयावल कि थ्व ला थनया रैथानै आदिवासी नेवाःतसें थःपिनिगु गुथिं यानाः थ्व फुक्कं ल्यनाच्वंगु जुयाच्वन ।
लिपा बुलुहुँ बुलुहुँ थनया जात्रा पर्व, थनया संस्कृति थःगु हे ताल । आः नं जि निम्ह म्ह्याय् दु । उमित नं थन जुइगु जात्रा, पर्व यक्व हे क्यने हया । उकी मध्ये नं येँयाः अर्थात ईन्द्रजात्रा, जनबहाःद्यःया रथ सालीगु जात्रा क्यनेगु याना । जिं मस्तय्त नं धाय्गु यानाच्वना कि थ्व जात्रा पर्व झीगु हे शान खः । थ्व हे झीगु म्हसीका खः, सभ्यता थ्व हे खः, अलय् झीगु अस्तित्व नं । थ्व मन्त धाःसा थनया म्हसीका जक मखु, झीगु देसया म्हसीका व पहिचान ल्यनी मखु ।
स्वनिगलय् च्वंपिं आदिवासी नेवाःतसें पिनें वइपिन्त थःकथं नाला काय्गु याः । अथे खःसा झीसं नं थःकथं नालेम्वाः ला सम्माननीय प्रधानमन्त्री जु ?
थ्व संविधानं स्पष्ट धाइ, गुथियात कयाः छुं नं कथंया संविधान दय्केमाःसा छुं हे याय्गु अधिकार मदु । थ्व संविधानं नेपाःया सनातन धर्मया रक्षा याय्गु धाइ । थ्व मौलिक अधिकार नं खः ।
थौं सरकारयाके अवश्य नं संख्याया आधारं दुईतिहाई दु । लिपा प्यब्वय् स्वब्व नं दइ वा फुक्कं छगू हे पार्टीया जुइफु, अथे धाय्वं संविधानय् दुगु सुंयागु नं अधिकार हनन् याय् दइमखु । आः संसदय् वःगु विधेयक मखुगु नियतं वःगु दु । थुगु गुथिया समस्या अलग हे दु ।
थुगु गुथि विधेयक सु नं किसानया नितिं वःगु धकाः किसानत झुक्के मजूसां ज्यू । म्हिगःया बुटवलया सुकुम्बासीं थौं बालुवाटारया जग्गा न्यात । थथे नक्कलि सुकुम्बासीतय्गु नितिं वःगु खः, थ्व विधेयक । थः परिवार, कार्यकर्ता पासापिं व भूमाफियातय्गु नितिं वःगु खः ।
थन जुयाच्वंगु आन्दोलनय् वःपिं सरकारी घ्यः नयाः वःपिं अरिंगाल मखु, थःगु सम्पदा, गुथिया रक्षाया नितिं फुक्क सीमा हाचां गायाः वःपिं खः । उकिं आन्दोलन यानाच्वंपिं आदिवासी नेवाःतय्त यक्व महाय्केत इनाप यानाच्वना ।
स्वनिगःया नेवाःतसें यक्व माया याय् सः, तर थ्व नं लुमंकादिसँ कि थनयापिं तंचाल कि उमिसं भष्म नं याय् यः । उकिं थ्व विधेयक स्थगित जक मखु, लित हे काय्माः ।
(वंघलय् माननीय सांसद गगन थापां गुथि विधेयक विरुद्ध बियादीगु न्वचुया लिधंसाय्)
