यँयाः व्यवस्थापन व न्ह्याकेत स्थायी कोष नीस्वन
सरकारं यँयाः व्यवस्थापन व न्ह्याकेत स्थायी कोष नीस्वंगु दु ।
 
मन्त्रीपरिषदया भाद्र २२ गतेया मुँज्यां ‘ईन्द्रजात्रा पर्व संरक्षण अक्षयकोष’ नीस्वनेगु क्वःछ्यूगु खः । 
 
कोषय् नेपाल सरकारं १गू करोड ५०गू लखतका तइगु जूगु दु । ३ नं. प्रदेश सरकारपाखें १गू करोडतका, येँ महानगरपालिकापाखें २गू करोडता व गुथि संस्थानपाखें ५०गू लखतका मुनीगु व्यवस्था यानातःगु दु । थुगु कोषय् मुनीगु मुक्कं ५गू करोडतकाया ब्याजपाखें दँय्दसं जात्रा खर्च यायेगु व्यवस्था मिले याःगु संस्कृति, पर्यटन तथा नागरिक उड्डयन मन्त्रालयया सह–सचिव घनश्याम उपाध्यायं जानकारी बियादीगु दु । 
 
कोष सञ्चालननापं व्यवस्थापन यायेत येँ महानगरपालिकाया प्रमुखया अध्यक्षताय् छगू समिति दइगु जूगु दु । समितिं दँय्दसं यँयाः नखलय् याइगु खर्चया बाँडफाँड याइ । उगु जात्रा इन्द्रजात्रा व्यवस्थापन समितिं न्ह्याकीगु नं मन्त्रालयं जानकारी ब्यूगु दु । 
 
यँयाः न्ह्याकेगु नितिं कार्यविधि दयेकीगु व थुकिया जिम्मेवारी येँ महानगरपालिकायात ब्यूगु दु ।