यति कार्पेटय् ९घौ लिपा मि नियन्त्रणय्
लहनान्यूज | तछलागा नवमी ११३७ (जुन १८ २०१७)
ख्वपया सल्लाघारीस्थित यति कार्पेट उद्योग च्यानाः झौ जूगु दु ।
म्हिगः चान्हय् ११ः३० पाखें च्याःगु मि ९घौ धइथें बिकाः थौं सुथय् तिनि स्यायेफुगु खः ।
मि स्यायेत येँ, यल, ख्वप, नेपाली सेना, नेपाल प्रहरी लिसेंया यानाः झिगः स्वयां आपाः दमकल छ्यःगु खः । दमकलं जक मगानाः लः ल्ह्यइगु ट्यांकर तकं मि स्यायेत छ्यःगु खः ।
उद्योग लिक्क दुगु ट्रान्सफर्मरय् विद्यूत सर्ट जुयाः मि च्याःगु धाःगु दु ।
फ्याक्ट्रीइ दुगु २५द्वः लिटर डिजेल, ३०द्वः टन स्वयां आपाः फाइवर व करोडौं तूगु मेसिन च्यानाः झौ जूगु न्ह्यथंगु दु । कार्पेट उद्योग पूर्णरुपं नष्ट जूगुलिं करिब डेढ अर्ब स्वयां आपाःया क्षति जूगु अनुमान याःगु दु ।
Categorized in राष्ट्रिय
