यलया मेयर उम्मेदवारपिन्सं प्रतिवद्धता प्वंकल
लहनान्यूज | बछलाथ्व चतुर्दशि ११३७ (मे ९ २०१७)
थौं हे यल महानगरपालिकाया मेयर उम्मेदवारपिनिगु प्रतिवद्धताया निगू बिस्कं बिस्कं ज्याझ्वः जूगु दु ।
यल महानगरपालिकाया मेयर उम्मेदवारपिनिगु आर्थिक विकासया प्रतिवद्धतायात कयाः यल उद्योग वाणिज्य महासंघं छगू ज्याझ्वः याःगु खः । अथे हे नेवाः पत्रकार राष्ट्रिय दबू यल कचां नं मेयर उम्मेदवारपिनिगु प्रतिवद्धता ज्याझ्वः याःगु खः ।
वाणिज्य संघया ग्वसालय् जूगु ज्याझ्वलय् यल महानगरपालिकाय् मेयरया उम्मेदवार मध्ये नेपाली कांग्रेसया चिरीबाबु महर्जन, नेकपा एमालेया हरिकृष्ण व्यञ्जनकार, माओवादि केन्द्रया दिनेश महर्जन, नयाँ शक्तिया मदन महर्जन, राष्ट्रिय जनमुक्ति पार्टीया रोशन महर्जन व स्वतन्त्र उम्मेदवारपिं रमेश महर्जन, प्रेमलाल महर्जन उपस्थित जुयादीगु खः ।
ज्याझ्वलय् उपस्थित मेयरया उम्मेदवारपिन्सं यल महानगरया आर्थिक विकासय् थःपिनिगु योजना कनादीगु खः ।
वाणिज्य संघया नायः सविन श्रेष्ठया अध्यक्षताय् जूगु ज्याझ्वलय् नायः श्रेष्ठं हे लसकुस यानादिल । सुभाय् न्वचु धाःसा संघया वरिष्ठ न्वकू रविन्द्रराज ताम्रकारं बियादिल ।
पत्रकार दबू यल कचाया ग्वसालय् जूगु ज्याझ्वलय् मदन महर्जन, रोशन महर्जन, स्वतन्त्र उम्मेदवार प्रेमलाल महर्जन, रमेश महर्जनया लिसें माओवादि केन्द्रया उपमेयर उम्मेदवार हसिना शाक्य झाःगु खः ।
उपस्थित उम्मेदवारपिन्सं यल महानगरपालिकाया सांस्कृतिक, भाषिक विकासया खँ तयादीगु खः । मेयरया दावेदारपिन्सं ललितकलाया तःमि देय् यलयात पर्यटकिय नगरया रुपय् विकास यानायंकेगु खँय् बः बियादीगु खः ।
दबू यल कचाया नायः सुरज व्यन्जनकारया अध्यक्षताय् जूगु ज्याझ्वलय् स्थानीय तहयात कयाः च्वसा न्ह्याकाच्वंम्ह पत्रकार सुनिल महर्जनं उम्मेदवारतयत महानगरया आवश्यकता व महानगरवासीपिनिगु मनंतुनायात ध्यानय् तयाः ज्या यायेत इनाप यानादीगु खः ।
Categorized in राजनीति
